中環在線：四太為靚仔CEO入股新興印刷
賭王四太梁安琪百足咁多爪，唔少大場面都見到佢身影，之但係，交易所上市儀式真係少見佢。噚日5隻新股上市，四太罕有現身捧新興印刷（1975
）場，佢仲斥資3,300萬元入股做基礎投資者，問佢點解咁睇好呢間公司，佢嘅答案竟然係，新興位44歲行政總裁（CEO）陳志堅「靚仔」！
四太噚日真係心情勁靚，人都好靚，佢話因為陳志堅靚仔而入股，都係講笑箒，實情係佢睇呢位後生仔平日工作，好有能力，對公司與生意夥伴好有責任心，佢因而睇好公司前景。
新興係家族企業，陳志堅爸爸70年代已經創立公司，陳志堅強調，印刷唔再係傳統行業，佢哋將印刷融入科技，例如做緊有聲海報，可以用手指觸碰發聲。
斥資3,300萬元
公司今次上市，四太斥資3,300萬元入股5%。四太指，新興有唔少新創意，啲玩具包裝又好靚，仲問有冇得增持股份，陳志堅當然話有喇。
四太罕有現身亦成為集郵對象，引到唔少人排住隊同佢影合照。華華發現，四太手上拎住嘅手機，唔係最新出嘅iPhone X，而係一部Nokia舊款手機。佢話自己用咗呢個款好多年，好用到就算壞咗，都會託人去鴨寮街搵番同型號電話，認真長情啊。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.finance.appledaily.com