金融High Tea 2017年11月24日
A股領跌 暗藏換馬
2017年11月24日
恒指升破三萬點，有中環茶友諗起97金融風暴時股樓齊升嘅繁榮，茶友居安思危，市場都有類似睇法，恒指破關而上，回吐壓力即時增加。港股噚日早上仲勉強想再撐上，但下午就頂唔住，指數急插，重回三萬點樓下，跌因主要係內地股市回挫，滬指出現年內最大單日跌幅，港股跟跌之餘，手機設備股插得特別多。
北水圍炒大股風吹港
恒指呢次破關而上，特別係側埋一邊而上，主力係推高騰訊(700) ，最多係炒多隻平保(2318) ，連騰訊親生仔閱文(772) 、契仔易鑫(2858) 都唔係咁炒。呢種圍炒大股手法甚有北水味道，可以睇到港股受內地資金影響不斷增加，例子之一係內地熱炒晶片股，唔少內地資金落嚟加倉買中芯(981) ，如果講技術水平同產品競爭力，中芯暫時只係算一流尾、二流頭公司，但內地資金炒作國產芯片未來會取代外國貨，講緊涉及產值以千億美元計，所以中芯粗粗地都炒上左。
內地大炒芯片股，除左憧憬未來芯片會國產化，同時炒作美國科網股資金轉移。現時美國科網股五強(FAANG)，包括蘋果、谷歌等公司估值已經太高，相比下技術含量高、有半壟斷性嘅優質晶片股估值相對吸引，所以資金開始轉移。內地資金有樣學樣，於是大炒晶片股。
蘋果概念股成沽貨對象
睇到呢個趨勢，就明白噚日午市急回，而且手機設備股跌得又急又快嘅原因。內地股市慢牛向上，滬綜指升破3400點後，基金經理開始有唔同睇法，部份繼續持倉，部份就開始減持同重新配置資產，所以指數升破咗呢條心理線後就出現拉鋸，出現技術性調整。
睇番中港兩地股市表現相似，但A股就先行一步，滬指午後曾經由半導體板塊帶動走強，但未能突破高點後索性插番轉頭，深成指、創業板指數跌幅雙雙擴大。滬指收市仲創左年內最大單日跌幅，上證指數收報3351點，跌左78點，幅度等同2.3%。
恒指跟跌，收報29707，跌左295點；國企指數收報11737，急跌221點，成交1359億元。平保升得急，跌得快，急挫3.8%，報收80.9元。騰訊下滑1.7%，收報419.6元，親生仔閱文本來想趁好市反撲，彈過上95.2元，可惜頂唔住回吐大浪，收市升左0.6元，報89.15元。
九倉置業(1997) 以介紹形式新上市，可惜時間慢左啲，變左冇乜鑊氣，早盤見過54.5元，收報50元，磚頭股唔當炒，所以暫時唔建議撈底。
以A股目前估值，似回調唔係大跌，但大市上上落落，大戶足以上下其手，移燈搬櫈，準備執過位、起過風。噚日蘋果概念股係跌幅靠前嘅板塊，唔排除呢個係基金開始為來年投資調整資產配置所引發。本地嘅手機設備股，雖然嚴格嚟講唔完全係蘋果設備股，但都好依賴蘋果去推動市場，所以噚日跌得特別厲害，好似舜宇光學(2382) 回調近3.7%，收報141.3元；瑞聲科技(2018) 跌幅更超過4%，收報169.5元。呢啲手機設備股估值唔平，如果之前冇賺過錢，依家都無謂去博嘞。
陸羽仁
金融High Tea 舊文
來源 source: http://hdfin.stheadline.com