吼淡市買平股
2017年12月21日
美國稅改方案基本過關，美股開始獲利回吐，港股氣氛漸趨淡靜，呢段時間市況轉淡，但淡靜市況都係慢慢揀股買吓的機會。
拆息升股市更靜
大市缺乏重要消息，市場關心係臨近年尾，港元拆息高企，本港銀行同業拆息(HIBOR)全線上升，與供樓按息相關的港元一個月拆息升至1.12679
厘，再創約9年高位，較昨日升近2.4點子。隔夜拆息升穿0.1厘，升至0.10482厘，升0.6點子。呢排無乜熱門新股上市，孖展唔係咁多需求，所以拆息升應該唔會阻住新股招股活動。長息方面，半年期報1.3516厘；一年期報1.5182厘港美息差擴大，港匯進一步轉弱，跌穿7.82關。港匯低見7.8239，是9月7日以來低位。
美國加息之後，香港並無跟隨，部份資金因此流走，隨著結餘減少，明年上半年香港加息機會好大。現時本地利率仲喺歷史低水平，利率上調嘅心理影響大過實際影響，唔排除個市會借勢再回一下。不過，如果手頭銀彈多，呢啲時間可以候低入貨，個市反彈就觀望，博過完年後有一月效應。中環茶友中不乏銀彈充足一族，佢哋入貨目標有兩類，一類係強勢大股，好似平保(2318) 。呢啲當炒大路股呢排帶住個市上上落落，到低位有時佢彈得幾勁，若然平價兜到有時走一轉可以賺份聖誕禮物，買呢啲股可以兼作短線，低買高沽，如果價位唔啱，未到止蝕位前就坐吓先。
另一類係有業績唔錯的白馬股，部份板塊呢排調整得比較厲害，個別股份跌比較多，譬如汽車股，升得快跌得甘，但個別業績應該唔錯，趁個市跌時入貨，博佢業績公佈時可以食胡。好似中國重汽(3808) ，由高位12.4元跌到去周初的8.2元，跌幅33.3%，昨日彈番去8.5元。現價市盈率40倍，中期業績股東應佔溢利為14億元人民幣，按年增幅4.7倍，每股基本盈利0.5071元人民幣。如果上下半年盈利一致，咁市盈率會跌到去8倍，數字上唔差，而且佢主力做卡車，市場獨特之餘，換馬需求應該持續。年中佢跟住汽車股炒上，但因為較為冷門，所以板塊調整時跌幅較大，如果趁個市淡靜時，有機會喺8元樓下入貨，照計都有唔錯值博率。
呢啲股份唔係咁當炒，買佢哋要有耐性，適宜喺淡市畀心機等候，好似昨日個市悶悶哋，全日上落不大，收報29234點，微跌19點，成交額縮至802.83億元。有啲季節性因素的股份好似濠賭股輪流炒，昨日到美高梅逆市升2.34%，收報24.1元；新濠國際升2.15%，收報23.8元；金沙(1928) 漲1.62%，收報40.7元。趁住外遊旺季，內地航空股都炒咗兩日，中國國航(753) 再升4.5%，收報9.59元；東方航空(670) 升5.8%，收報5.49元、南方航空(1055) 揚5.6%，報8.17元，齊齊升上逾一年高位。但好似重汽呢啲股份無乜炒味，股價有機會插一插試吓低位，所以未來幾個交易日，仲有機會可以吼吓係咪買到平貨。
丘鈦低位先嚟配股
手機設備股呢排輾轉向下，瑞聲(2018) 舜宇(2382) 齊跌，做指模模組的丘鈦科技(1478) 就宣佈，以每股10.8元配售最多2000萬股新股，佔公司擴大後股本1.79%，配售價較周一收市價11.22元，折讓約3.74%，收市跌4%，報10.78元。丘鈦年中時曾經好當炒，股價見23元高位，依家跌咗咁多先嚟配股，集資額唔算大，從小股東角度當然唔老嚟啦。早前另一隻有做手機配件的通達(698) 配完股就洩咗氣，所以買咗丘鈦的小股東都要留意，佢低價配股係有短期炒作，抑或係趕急套現。
陸羽仁
金融High Tea 舊文
來源 source: http://hdfin.stheadline.com