智取大市：見頂之日仲未到
■恒指22日之中升咗21日，直至噚日始錄單日跌幅，象徵買需如狼似虎，有進一步向上嘅動力。黃偉傑攝
恒指9日RSI星期三錄得94.4，但噚日港股一跌，RSI回落到78.71。回顧周初所講，恒指9日RSI超越90之後進入調整嘅個案，其後都有能力再破頂。今次小弟更
詳細咁交代統計結果，發現1984年至今，總共9次恒指9日RSI高於90，呢9次之中，全數9日RSI喺90樓上見頂回落後，都仲有RSI頂背馳，即恒指仲會再創高位至少多一次。
9次Sample當中，調整日數介乎1至5日，即使係最多嘅5日調整期，都唔會5日內全跌，當中真正錄得顯著下跌嘅日子，最多只有2日。如果今次重覆過往趨勢，由於噚日恒指已跌304點，以收市價計，最多只會從現水平跌多一日，就會短線見底，然後好快明顯突破33000點。另一個觀察係，調整日數越短，稍後升勢越快、越急、越早完。
呢項統計得出未見頂嘅結論，除咗命中率夠高之外，目前RSI強勢同市場買需形勢亦相當吻合，恒指22日之中升咗21日，直至噚日始錄單日跌幅，象徵買需如狼似虎，絕對有進一步向上嘅動力。
恒指9日RSI突破90，多數喺牛三嘅產物，對上兩次係2015年4月、2007年10月，但世事無絕對，當中仍有2005年大升市中段嘅個案。呢項統計反映最合適嘅短線策略，就係一日未再破頂、一日唔未駛諗再減持住，至於破頂會再升幾多，就睇嚇港股單日升幅有冇明顯擴大，有就接近見頂時間。
晉佳
晉佳
智取大市 - 晉佳 舊文
來源 source: http://hk.finance.appledaily.com