中環在線：小小超員工呻自費食春茗
新年開工，打工仔最想收到大封嘅開工利是，但小小超李澤楷旗下香港電訊與電盈嘅員工就冇乜期待，因年年都冇開工利是收。咁都唔止，兩間公司嘅員工爆料，指今年要自己畀錢先可以食公司春茗飯，舊年仲可以用team building嘅公費埋單，今年上司講明唔可以，
一定要自費180蚊呀。
爆料員工話，上年抽獎大獎雖然有一萬蚊，但要同3,000幾名員工爭，每枱亦只有一位員工有過百蚊嘅Tap& Go儲值額，加上菜式普通，180蚊唔算物超所值。
另一位員工就指，自費出席春茗唔係第一年嘅事，基本上年年都要自費，唔同team上司有唔同做法，有啲team上司會請埋下屬去春茗，可能係上司舊年同今年做法唔同，先令到個別員工失望，而且今年180蚊已經比上年平。
發言人：公司有大幅資助
香港電訊與電盈發言人回覆指，因春茗深受員工歡迎，近年全部超額報名，所以舊年開始移師亞博館。春茗獲公司與管理層大幅資助，員工可免費坐交通工具到會場，當晚亦有大量抽獎獎品，包括現金獎。另外，員工喺農曆新年假期做嘢，其實有利是收。
據了解，舊年出席員工有3,000至4,000人。粗略計，當全場3,500人，每人180蚊，最低消費63萬元，唔知當日表演嘉賓許廷鏗與C AllStar又點計嘞。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.finance.appledaily.com