銀行盈利「直入尾袋」
2018年02月23日
內地股市開門紅，上證指數升近2%，但難敵美股受聯儲局放鷹疑惑高開低收拖累，港股開市回軟，並以低位收市。
美股前晚本來升得好哋哋，但因為聯儲局會議記錄披露，官員認為美國增長加快，通脹上升，未來要繼續逐步加息。
相關說法被理解為放鷹，
於是美股急回，倒跌167點收市，高低波幅超過400點。美國利率上調同通脹顧慮主導咗近日美股氣氛，指標係10年期債券以三厘為分水嶺，儲局記錄觸發債息升穿2.9厘，市場資金立即沽股作為回應。
增長強勁本來係經濟好表現，但市場自2009年金融海嘯以來，習慣咗超低息環境，O依家利率雖然只係趨向正常化，但過程會不斷觸發敏感反應，直至市場克服咗對利率趨升心理威脅。
息差擴闊料今年持續
同美股相比，內地股市對利率敏感度暫時無咁高。過年前銀根緊張，形成沽貨壓力。過完年關壓力紓緩，春節前買了貨的投資者並未急於食胡，所以A股冇受外圍影響，順利紅盤高收。上證指數收報3268點，大升69點；深證成指收報10658點，升227點。市傳蘋果有意從礦場企業直接買鈷減低成本，多隻有色金屬股急升。香港掛牌的洛陽鉬業(3993) 都逆市急升8.35%，收報6.36元。
港股雖然下跌，但金融股普遍表現較佳，東亞銀行(023) 公佈去年全年業績，純利增1.5倍，至93.5億元；撇除出售卓佳錄得約30億元溢利，去年持續經營業務盈利62.98億元，按年升近80%。
每股基本盈利3.21元；第二次中期股息0.6元。全年派息1.28元，按年升1.3倍。
本地銀行業去年表現相當唔錯，滙豐銀行成為成個滙控(005) 最賺錢業務，恒生(011) 業績靚仔就有目共睹，東亞同樣公佈唔錯業績，股價逆市升番0.1元，收33.65元，雖然昨日股價升得唔多，但佢嘅股價已經連升六日，累積升幅達6.49%。
持有東亞主要股權的國浩(053) 升0.8元，收109.4元。去年美國開始加息，香港息口無郁過，但本地銀行已因為息差拉闊受惠。今年美國如果持續加息，港息幾時跟加未知，但相信息差改善會維持。
監管加強削內險增長
中環茶友話，喺香港做生意，經濟好唔代表經營容易，皆因租金、人工跟住加，你睇本地兩個樂園連續三年見紅就知啦，唯一例外係做地產銀行，皆因佢哋係資本密集生意，而且市場競爭極為有限，只要需求一增加，客仔就完全失去議價能力，利錢就「直入尾袋」，O依家本地銀行估值話高唔高、話低唔低，但因為前景仲係幾靚仔，仍然係低位炒上落目標板塊。
藍籌公佈業績理想，但港股昨日收報30965點，急跌466點；國企指數收報12528點，跌158點，成交1207億元。
平保(2318) 內地A股造好，不過H股就跌1.67%，收報85.15元，可能係因為內地公佈上市險企今年一月份原保費數據，四大包括中國人壽、平安人壽、太平洋人壽、新華保險一月份合計實現原保費收入3109億元，按年負增長0.79%，也是自2014年以來四大上市險企壽險原保費按年增速首次出現負增長。
市場一早預期今年上市險企新單保費增長會較為「疲軟」，主要是保監之前持續加強對壽險監管，一月份公佈證實這個估計。再細睇，四大險企合計保費出現負增長，反映市場大圍疲軟，當中國壽係大輸家，錄得21.33%負增長，其他平安人壽、太平洋人壽、新華人壽均出現正增長，按年分別增長21.47%、24.44%、9.95%。
監管加強帶來的影響，可能要到下半年先消散，而國壽遇到的壓力會比較大。
陸羽仁
金融High Tea 舊文
來源 source: http://hdfin.stheadline.com