智取大市：撈底先認清目的
■跌市時如要撈貨，要有長線目標，買完放落放枕頭底。資料圖片
市場情緒出奇冷靜，恒指跌幅5%，比2016年英國脫鈎公投或特朗普當選時嘅單日跌幅有過之而無不及，喺冇重大新聞之下都搞成咁，大行講得最多嘅係「系統性沽盤令股市大跌，但基本因素仍然良好」之類嘅言論。
周一
港股低開886點之後，火速補返下跌裂口，噚日呢一口大成交下跌係突破性裂口？定算係消耗性裂口？暫時當係向下突破穩陣啲，皆因大跌市嘅真正底部，低位會大幅波動、舞高弄低，無論跌同反彈速度都相當高，市場情緒都大受影響，今日完全未見呢種情況，未去到物極必反。
資金緊縮觸發嘅跌市，道理同資金升市相反，升市時千祈咪沽空個市，跌市理論上咪亂撈貨。要跌市時撈貨嘅話，得嘅，但要有長線嘅目標、放枕頭底嘅氣慨，如此一來，就同買入時間無關，只係同選股有關。道理一如有人喺2007年10月買入騰訊（700）長揸，之後一樣贏到笑。
至於想博反彈？恐慌撈底博反彈有兩項條件，第一，見底嘅技術指標、證據夠充足，通常以指數往績同拋售程度去量度；第二，撈底後就算再跌、都有信心反彈能上返之前買入嘅位置，務求坐和望贏去博，呢個講緊嘅係值博率。不過，而家兩項條件似乎都未成立。
晉佳
http://fb.com/advanceguy1
本欄逢周一、三、五刊出
晉佳
智取大市 - 晉佳 舊文
來源 source: http://hk.finance.appledaily.com