一路一帶：毛記六個必須知道的事
■林日曦可謂毛記嘅生招牌，會影響毛記嘅發展同業績。資料圖片
100毛母企毛記葵湧（1716）即將上市，勢成今年超購王，筆者難講會否炒得勁過「天仁茗茶」母企賓仕（1705），不過細閱毛記上市文件，發現幾個有趣地方，毛記生招牌「腦細」林日曦憑《100毛》紅
爆香港，原來佢自己多年來在社交媒體賣廣告收入高達360萬，但係唔使同毛記拆傭的，不過上市後因為涉及競爭等因素，腦細焗住要同毛記拆傭高達五成。
仔細睇嚇毛記招股文件，會留意到幾個有趣地方：
（1）腦細林日曦（原名徐家豪），一直都有在個人FB專頁賣廣告，相信各位毛粉都睇唔少，腦細一個post動輒數千個like，自然成為價值不非的廣告銷售點，文件披露腦細會應獨立第三方於個人專頁發佈動態消息廣告，截至2016年收20萬及截至2017年3月底收200萬，以及截至2017年11月底8個月收140萬，即合共收取360萬元廣告費，當中係幫25位客戶發佈咗合共49條動態消息廣告，即每條動態廣告平均收費為73,469元。同時，呢25位客戶都係毛記嘅客戶，但腦細係唔使同毛記拆傭，即係有食兩家茶禮之嫌（好似係）。
（2）三位股東喺營運毛記期間，亦會受邀出席商業活動，姚家豪（阿Bu）、陸家俊（陳強）以及林日曦分別承接6場、4場及17場演出及活動，另外四位客戶亦請咗阿Bu參加6場自由演出及活動，4位客戶入面有3位係毛記客戶。林日曦獲12位客戶邀請參加17場自由演出及活動，12位客戶同時係毛記客戶。而3人憑上述商業活動，於截至2015年收19.3萬、2016年收19.8萬、截至2017年3月底收170萬以及2017年11月底收40萬元，合共收249.1萬元。
（3）毛記喺招股文件表示，股東參與自由演出及活動作為除外業務不會對本集團的營運產生重大不利影響，主要原因係「任何演出機會即使不由控股股東承接，亦未必會提供予本集團的藝人，反之亦然。」不過既然上得市，投資者有份入股公司，當然要公平處理日後公司營運，盤數見咗光，各位股東再喺個人專頁賣廣告時，就唔可以再直接或間接同公司競爭，亦唔可以損害公司及股東利益，於是各股東同集團訂立代理協議，即係毛記上市後，3位股東在客戶要求其在個人專頁上發佈動態消息廣告，會由毛記全權獨家代理，預期要同毛記拆50%傭，預計由2018年至2020年，林日曦每年大約要拆110萬至130傭給毛記。
（4）毛記𠵱家總共簽咗19個藝人，由去年7月至今仲簽多3位藝人，目測有可能係3位腦細。
（5）毛記由2016年至2018年期間，搞咗3個備受矚目嘅項目，3個客人分別係「跨國旅行社」、「跨國餐飲製造商」、同埋「跨國銀行及金融服務公司」，IP都唔使Check，應該係Expedia、雀巢同埋渣打（2888）。毛記五大客戶之中，有兩位長情客已經幫親咗毛記四年，對毛記嘅忠誠度及支持度甚高。
（6）著名填詞人林夕（原名梁偉文），今年3月2日起擔任毛記獨立非執董。
總結：三位股東，尤其係林日曦可謂毛記嘅生招牌，其個人魅力及重要性等如Tesla嘅Elon Musk，筆者覺得毛記可以冇咗東方昇，冇咗專家Dickson，但唔可以冇咗腦細。腦細嘅表現同執行力，會影響毛記嘅發展同業績。
利申：筆者抽咗毛記！（打還打，唔好打面）
斯郎
https://fb.com/oneroadonebelt
斯郎
~TITLE_S~一路一帶 - 斯郎 2018年3月22日 舊文
來源 source: http://hk.finance.appledaily.com