中環在線：蘇澤光篤爆 港交所史美倫揸fit
港交所（388）主席周松崗做多一個月就退任，市傳金發局主席史美倫係大熱，咁啱瑞信噚日朝早舉行投資者論壇，瑞信大中華區高級顧問蘇澤光（
又即係機管局主席）認真鬼馬，佢做主持喺台上介紹講者史美倫時，除咗話佢係現任金發局主席之外，最後突然補一句：「我哋都知道佢將任下屆港交所主席。」
史拒回應
史美倫講完speech，就邊行邊話唔回應提問，趕住要去下一場開會咁話。咁究竟蘇澤光係咪一時未食早餐，定係真心爆料，就真係唔知喇。
雖然盛傳史美倫係港交所下任主席，但程序上都要走一轉嘅，港交所4月舉行股東會後，董事會互選產生一位主席，最後由特首林鄭委任，史美倫作為林鄭財金三大靠山之一，似乎都冇乜阻滯。
而史美倫喺金發局嘅主席任期下年1月屆滿，如果4月獲選為港交所主席，就有大概9個月嘅重疊期。
史美倫監管背景一啲都唔弱，前後喺證監會同中證監一共工作十幾年，上任後應該可以促進港交所同證監會之間合作無間啩。
人在其位，史美倫亦有例牌講講金發局未來發展方向，例如研究監管上有乜值得放寬同改善，點樣發展香港私募投資等等。不過晨早俾蘇澤光咁樣講一講，大家將焦點放曬去主席之位喇。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.finance.appledaily.com