智取大市：優質消費股硬淨
■二三線消費股硬淨，李寧季績後仲有得逆市升。 資料圖片
投資者驚港匯觸及7.85，金管局入市買港元令資金緊絀，呢種憂慮本來合理，但港匯弱勢多時，股市遲至美國公佈議息結果前夕先開始反映。另一方面，聯儲局亦暗示今年加多兩次息、全年加三次息，其實係比原先預期溫和咗
。點解港股仲要跌？因為大家原先諗住美國加息速度不如預期嘅話，港匯有條件反彈，但議息後港匯繼續走弱，港資金流呈弱勢，大家恐防唔係短期因素，於是加大沽貨意欲。
資金洗到平日大家最唔捨得沽嘅騰訊（700），收市後先知Naspers沽1.9億股，呢個因素，對市場短期氣氛影響唔細。另一項考慮因素，係美股道指可能跌破整固市以來支持位嘅100天平均線，值得留意穿咗之後嘅市場反應，只要破支持位後仍見承接力，港股先能夠早日企得穩，但相信點都要捱埋聽朝呢刀先有價講了。
李寧（2331）、海爾（1169）季績後仲有得逆市升，爭少少破頂。二三線消費股定係大藍籌之間選擇，結果近期係二三線消費股能夠屹立於動盪市之中不倒，稍勝一籌。港匯弱勢預期對市場影響總有一日淡化，股市要反彈，大藍籌當然較能食應反彈潮，但二三線股有基本因素支持的話，可避開急升急跌嘅戰場，呢一刻把握度較大，不妨等候低吸機會。
晉佳
http://fb.com/advanceguy1
本欄逢周一、三、五刊出
晉佳
智取大市 - 晉佳 舊文
來源 source: http://hk.finance.appledaily.com