智取大市：過熱已反映了嗎
■近期市況急劇變化，好友暫時Lead住兩三分，稍有優勢而已。 資料圖片
以目前波幅，港股新方向未必等太耐。2月港股千千聲跌落嚟，上落市都可以維持幾百點波幅，如果分到方向，往後波幅當然唔會低。
短線都有少少向好跡象，以30分鐘圖去觀察，都見到恒指以至三大散戶至愛
騰訊（700）、平保（2318）同港交所（388），由2月尾到而家，開始逐步由一浪低於一浪，變為一浪高於一浪。面對市況急劇變化，用打NBA比喻，都只係話好友Lead住兩三分，稍有優勢而已。
睇日線圖，同一個圖表，有唔同嘅歷史走勢可以比較，喺呢度，就一次過同你比較兩段相似嘅走勢，結果原來好唔同。恒指1月升完再急插，至今形成超大型對稱三角形，同07年12月相當近似，唔通之後學Bill Gates話齋，會進入金融海嘯2.0？但睇近期恒指整固圖形，又同舊年12月尾相當近似，唔通又似1月升市前奏？你可能話「咁你講曬啦！」
只不過分辦上述急升劇本機會高啲、還是急跌劇本機會高啲，更具意義，1月市場亢奮程度，同07年10月未有得揮，未去到極端超買水平。加上之前提到，鮑威爾等聯儲官員都預備咗今年加息3至5次，將來嘅過熱，似乎未足夠喺股市反映，故暫時審慎地信好友力量先。
晉佳
http://fb.com/advanceguy1
本欄逢周一、三、五刊出
晉佳
智取大市 - 晉佳 舊文
來源 source: http://hk.finance.appledaily.com