金手指：已經大手撈俄鋁
■俄鋁基本因素係冇問題，噚日暴挫，係貿戰嘅第一個核爆試點。 資料圖片
呢個世界，冇嘢好得過接啲被迫沽出來嘅貨。記得08年雷曼爆煲後，當時好多隻股票完全冇人掛牌買。嗰啲被贖回嘅基金，為應付啲客嘅退款，或者係借爆揸到成手貨後被call loan嘅人，唔可以沽啲想沽
嘅。只能沽啲沽得，有人接貨嘅。嗰啲情況撈，不但大減價鳩嗚，沽嗰個仲要當你係大恩人！爽到呢。
上周香港收市後，成日被花旗左膠串係普京BFF嘅總統侵侵，忽然話「制裁」十幾個人同一群公司。榜上有名嘅，就係噚日股價跌一半嘅俄鋁（486）。睇沽嘅排牌，美資行啲客不問價沽。因對花旗國民，如果一個月內唔沽清手上俄鋁股票，就係違法，即係終極「焗沽」啦！
被財仔call loan唔沽貨，最多都喺屋企門口淋紅油。美帝叫沽你唔沽，就分分鐘要去關塔那摩享受陽光與海灘。咁香港有啲被罰到high high嘅金融機構，例如揸兜銀行，喺俄鋁跌到仆直時，只准沽唔准買，進一步收窄撈底需求。
俄鋁基本因素係冇問題，鋁價仲要高企。噚日跌到落呢個價，就係反映市場覺得佢執笠。所以，你心裏嗰條終極問題：「撈唔撈得？」答案係你覺唔覺得佢會執？我覺得唔會，所以噚日大手撈。
俄鋁嘅走勢，就係貿戰第一個核爆試點。大家要預咗你手上啲大價股，他朝君體也相同。到時恐慌性拋售，可能賣咗畀我呢啲人。
孫柏文
獨立股評人
http://fb.com/shuen
本欄逢周二刊出
孫柏文
金手指 - 孫柏文 舊文
來源 source: http://hk.finance.appledaily.com