特朗普玩打仗 油金續炒
2018年04月12日
國家主席習近平以柔制剛，在博鰲論壇拋出四點加大開放政策，中美貿易戰降溫，短期氣氛稍為平靜，只望特朗普不再在貿易戰上搞事，怎知呢個總統為求攞分停不了，又轉頭向敍利亞出手。
在香港時間昨日黃昏近七時，特朗普在twitter發帖，叫板俄
羅斯，話俄羅斯要聲言要射低所有攻擊敍利亞的導彈，他叫俄羅斯預備好，因為導彈快來了！現代社會在社交媒體上宣戰，以前若作這些劇本都會俾人鬧。
特朗普話敍利亞政府軍用化武對付平民，所以要出兵修理，俄國話會支持敍利亞政府。打到嚟了，杜指期貨昨晚初段應聲下跌超過200點，油價彈升。佢咁搞，股市會幾波動。
另外中國人民銀行行長易綱再在論壇公佈好消息，把中港股市互聯互通每日額度擴大至四倍，此舉對近日無乜好消息港交所，都算是好消息了。
易綱透露，由5月1日起，內地與香港的互聯互通額度將會擴大至四倍，滬股通和深股通每日額度從130億調整為520億元人民幣，港股通每日額度從105億調整至420億元人民幣。另外，中英兩國「滬倫通」進展順利，希望爭取2018年內開通。他明言擴大滬股通、深股通及港股通每日額度，反映有序實現資本項目可兌換，強調人行改革步伐穩妥，要控制風險，令改革過程平穩。
阿爺鑿大港交所水喉
中國證監會副主席方星海就話，因為A股要進入大摩MSCI指數，境外機構投資者有需求，但是調整投資組合需要很多額度，目前這個額度太少了，加上中國有需要進一步擴大資本項目可兌換，所以作出調整。由於境外投資者主要為機構投資者，所以看他們投資行為非常穩定，而且他們投資在中國股市比例非常低，大概2%，估計不會對股市有甚麼大波動。
受到消息刺激，近排沽壓幾大的港交所(388) 彈上，最高曾經升上270.4元，收市報264.4元，升1.5%，又唔算好大反應。港交所年頭股價一條龍，但隨著油企巨無霸沙地阿美傳出擱置海外上市，到內地話推出中國預託證券(CDR)吸引科網股回流，令佢股價轉弱，變咗半條蟲。從內地一舉擴大互聯互通額度，反映內地對香港市場融資能力仲係好重視。雖然擴大到四倍唔一定代表有咁多北水南下，但政策反映中央繼續支持香港股市。
滬港通開始之初，南下北水唔明顯，大家都覺得無料到，但到上年起，開始有好多錢來港買騰訊等內地無上市股份，令港股成交大增，O依家水喉鑿大咗，係咪有咁多水會流落嚟，當然仲要睇香港能否拉到好公司掛牌配合。
至於內地發行CDR對港股有幾大衝擊，有熟悉情況人士話，發行預託證券要由銀行進行，初期要解決點搵股票作為發行資產，這些都要慢慢搞，而且買賣途徑會較為狹窄，基本上同港股係兩種不同產品，言下之意，似乎暫時見唔到佢對港股有好大衝擊。
友邦價唔平但質素高
博鰲論壇接連傳出利好政策，恒指再升多日，收造30897點，升168點；國企指數收報12324點，升不足1點，成交1330億元。表現好的藍籌反而係本地公司友邦保險(1299) ，急升4.7%，收報71.6元，相信係大家覺得內地進一步開放保險市場，過去已經做得好好的友邦會再有機遇，所以資金湧入。
內地開放保險市場係中線利好消息，無咁快可以反映喺盈利之上，但友邦本身基本因素強勁，加埋有憧憬，股價大力爆上。友邦去年全年溢利61.2億美元，按年增幅 47%，現價市盈率17倍，派息1.4厘，股價唔算平，但勝在質素好，可以視作中長線投資目槱。另外，中石油(857) 受惠油價急升，漲咗3.75%，收報5.53元。
中美股市喺貿易陰影下反彈咗兩日，市場觀望氣氛轉濃。美資摩根士丹利就發表報告，調低包括香港共亞洲七個主要指數目標，主要因為近日冒起的貿易保護主義，料帶來不確定性，美國和中國收緊貨幣政策，或抑制本益比水平。該行將恒指基本目標預測，由31500點，下調至30350點。國指目標預測由12450點降至12150點。至於大摩對恒指最牛預測目標為37600點，最牛國指目標預測，則由15150點，升至15300點。
陸羽仁
金融High Tea 舊文
來源 source: http://hdfin.stheadline.com