【實力取勝】何猷龍有眼光（陳承龍）（第176期）
2018-5-10 18:48:51
炒股嘅嘢，唔係贏就輸，小弟好鍾意炒股，從來都唔會放棄，邊度跌低，邊度起返身。其中小弟長期睇好嘅新濠（200），似乎有料到，好事近。喺美國上市嘅賭業股嘅走勢近期相當靚，當中以新濠持有嘅新濠博亞
（MLCO）最靚。
值得一提，新濠博亞去年5月公開發售合共約1.65億股普通股，所得資金11.63億美元（約90.14億港元），用嚟回購皇冠度假集團（Crown Resorts）手上僅持嘅11.2%新濠博亞持股。
若果按當時新濠博亞每股美國預託股份（ADS）22.34美元同1股ADS相等於3股普通股計，估計涉資約12.28億美元（約96億港元）。
皇冠前年5月開始減持其於新濠博亞嘅持股，當時新濠國際以約8億美元向皇冠回購部分持股，皇冠於新濠博亞嘅持股比例由34.3%降至27.4%。至前年12月15日，皇冠再度將新濠博亞13.4%股權售予新濠國際。
兩次新濠回購皇冠嘅新濠博亞持股，每股做價介乎14-16美元水平，如今新濠博亞的最新每股做價超過32美元，就可見得何猷龍幾有眼光。既然新濠博亞咁好景，作為「阿媽」嘅新濠，有乜理由唔升呢？
另外，對於滙控（005）最新季績，確實有啲失望，但諗深一層，佢做咗一次過近9億美元嘅撥備，去應付美國將來嘅罰款，同時又放咗幾億美元去投資業務。
至於有傳工商銀行（1398）曾有意收購滙控，有乜出奇？滙豐冇一個有控制權嘅大股東，理論上係可以被收購。
最緊要係得到管理層同意。如果工行買咗，可以立即變成有一個世界最大網絡嘅國際銀行，到時可以將62%嘅恒生銀行（011）賣畀另一間大內銀，又將19%嘅交通銀行（3328）賣畀有意進軍中國嘅外資銀行，套現3000億港元。又或者，由一個大型外資銀行收購，用滙豐嘅平台打入中國呢個最有龐大商機嘅14億人口市場，尤其中國已表明了開放金融領域畀外資，而滙豐已經有200間國內分行，喺中國有20年以上嘅經營團隊和根基，好有價值。唔怪得平保（2318）買咗6.2%滙控，如果被收購會股價升，唔被收購都有5%股息，與此同事，平保又買了7%工行，係咪巧合呢？
實力取勝 - 陳承龍 舊文
來源 source: http://www.winmoney.hk