【大茶飯】中旅都係大灣股（青冰）
中金上周就A股加入MSCI發表報告，推薦9間A股公司，話臨近生效日將有短線獲利機會，分別係貴州茅台、海康威視、美的、五糧液、伊利、中國國旅、立訊精密、華東醫藥及大族激光。青冰雖不是A股專家，但除了最後那三間公司，其他都有點了解。
如要做短線，尤其是炒入某
某指數，青冰都習慣先看圖表，雖則話屆時有較大的買盤湧入，但若然那隻股比較多蟹貨，盲目追入似乎只係為蟹民提供一個鬆綁的機會，以上九間公司全是入摩的受惠股，但當中大部分都走勢轉差，而只有華東醫藥及中國國旅係貼近全年高位，買股揀強勢，相信要博都應該係呢兩隻。
中國國旅較吸引青冰的眼球，除咗個長升走勢圖嚇死人之外，業務簡單易明，要理解並不困難，傳統旅行社業務在17年就麻麻，反而增長得最勁嘅係免稅店業務，在國家大搞內需及旅遊業之時，這股的確係食正條水，而國旅的強勢，亦令青冰聯想到姊妹公司香港中旅(0308)。
這間老牌紅籌公司，同其他同輩一樣，一向給市場的印象都係一般，營運效率差，架構複雜，冇乜大志。同國旅相似，傳統的旅行社業務並不是最賺錢的，收入最高的還是經營主題公園、渡假村及旅遊物業發展，但最近9個月股價咁強勢，原因並非此業務，炒的主要是賣旺角中旅的物業，誘發市場重估佢地嘅物業價值，股價由本來的對NAV折讓，升至現時已是1.1倍PB，雖然估值仍低，但唔好忘記公司坐擁凈現金30億元，加上仲有14億金融資產(相信大部分為理財產品)，咁多錢在手都唔派俾股東，息率不足兩厘，所以要提升估值，都有一定困難。
港珠澳大橋及高鐵通車後，對中旅的旅遊業務應有正面作用，加上睇年報，發現佢哋酒店、主題公園、渡假景區都盡在大灣區，咁其實佢都係大灣概念股，市場日後炒呢個因素，都總比物業資產豐厚來得踏實啊。Fb個人專頁http://www.fb.com/chingbing888
大茶飯 - 青冰 舊文
來源 source: http://hk.finance.yahoo.com