科網股仔投機潮起
2018年05月25日
港股插咗一日後企穩，昨日反覆升94點，收市報30760點，成交顯著縮減至898.8億元。國企指數收市報12152點，升61點。
阿里影業炒過大摩價
藍籌無方向，市埸轉炒吓股仔。摩根士丹利首予阿里影業(1060) 「中性」評級，目標價0
.95元，加上又轉會回內地上市，阿里影業見1.28元一個月新高，收市急升32%，報1.21元，收市價超越大摩首予目標價27%。
阿里概念股甚至其他科網股同步炒上，阿里健康(241) 升12%，收市升1.5%至6.89元，成交13.1億元；雲鋒金融(376) 升5.4%，報5.3元。華誼騰訊娛樂(419) 升15.3%；恒騰網絡(136) 升4.7%；網龍(777) 升12%。個別大型科網公司旗下股仔好多都未有具體業務，暫時得個炒字。
小米傳出有意在下月底招股，成為香港首間「同股不同權」科技公司，同系金山軟件(3888) 首季度淨利按年下滑50%，公司去年全年表現靚仔，主要係因為雲業務表現出色，但今年就因為手遊生意被騰訊搶生意令收入下跌，金山股價公佈完即跌，昨日反彈升2.8%。
金山軟件業績走樣，主要係網絡遊戲收益為6.32億元，按年下滑23%，集團網絡遊戲每日平均最高同步用戶人數約為70萬人，按年跌咗25%。金山業績同騰訊上星期公佈數據剛好相反，騰訊手遊業務強勁成為帶動盈利主因，反映兩間公司喺呢個領域短兵相接。首季金山受挫主要係手頭王牌手遊開始老化，被對手乘虛而入，新產品又延遲上市，有點青黃不接。假如新遊戲上市，可能會扳回劣勢，但騰訊在手遊有不同公司研發產品，依序推出，形同龐大軍團，令其他公司備受壓力。
騰訊力壓金山手遊
同樣情況喺其他增長領域都出現，好似金山雲服務係增長亮點，首季按年增長仍達56%，但騰訊剛剛宣佈會調整服務價格，以增強競爭力，可見在科技產業，強者贏盡，競爭比傳統產業仲殘酷。對計劃在港上市的公司小米集團，點樣可以攞到靚價上市，增加彈藥打仗，就要度橋搵到賣點。對於外傳小米已選定其上市的基石投資者，首輪招股價諮詢亦已展開，估值介乎630億至680億美元(約4914億至5304億港元)，創辦人雷軍就拒絕承認，好明顯雷軍係希望用好啲估值上市，但現時公司仲未可以好清晰咁話俾市場聽佢有乜嘢吸引。
根據報道，小米已確定的基石投資者包括中國國資委、新加坡政府投資公司(GIC)同國壽。好坦白講，基礎投資者對於市場號召力有啲今不如昔，大家明白呢啲好可能係畀面派對，特別係一啲主權基金，佢哋大把水等買嘢，外界最重要就係公司有乜特別賣點，否則一間科網公司，其實同一間傳統公司無乜分別，都係要喺艱苦環境下作戰。
陸羽仁
金融High Tea 舊文
來源 source: http://hdfin.stheadline.com