智取大市：美國搞事的意義
■特朗普接連搞事，市場相信他是一早計好曬數，並非撩交打。資料圖片
貿易戰、加息、資產價格、消費，似乎一環扣一環。環球資產價格飛升，近年為消費帶嚟動力。資產價格只要出現具意義跌幅，影響消費程度會相對嚴重。
從上遊商品以至生產設備銷量大幅上升，遲早推高生產成本以
至通脹，美國加息係正路之途。私募基金近年頻頻槓桿買資產，當美息升至3厘，面對資產回報率只有3厘幾，槓桿投資者會全體消失，環球資產市場單靠大陸佬係唔容易支持落去。資產價格升浪結束冇人能夠阻到，但斷唔會因為美息上升而人為地結束。
華府阻止加息嘅兩個選項，第一係增加對通脹嘅容忍度，但忍極有個譜，而近期特朗普發動貿易戰，突然成為新選項。當市場走向悲觀、前瞻性經濟指標回落時，就大條道理放慢加息。拉長資產價格升浪，阻止中國發展科技進程，對美國而言，難分清邊樣更逼切，但貿易戰竟能一石二鳥。
留意嚇2年期同10年期美債孳息率曲線不斷收窄，分析認為市場對美國經濟前景審慎，亦反映市場覺得美國長遠加息有個譜。喺股市，地產股唔上唔落，唔同板塊股價相對冷靜、理性，亦顯示市場相信美國喺文章開首嘅唔同因素之中取之平衡，計曬數非為撩交打。若市場當正打仗，恐怕恒指早就冇二萬四了。
晉佳
http://fb.com/advanceguy1
本欄逢周一、三、五刊出
晉佳
智取大市 - 晉佳 舊文
來源 source: http://hk.finance.appledaily.com