一係反枱 一係反彈
2018年06月20日
中美貿易戰有點急轉直下味道，除咗實施關稅外，美國總統特朗普仲話會加碼，考慮對中國2000億美元貨品徵稅，以報復中國報復，市場風聲鶴唳。
同時，中興(763) 早前與美國政府達成和解，並將支付14億美元罰款及改組董事會和管理層，以換取
美國撤銷對公司禁制出口令。但美國國會參議院通過2019財政年度國防政策法案，當中包括恢復禁止向中興銷售美國配件禁令，中興股價即時再插底。美國步步進逼下，中國只能應戰，貿易戰有升級威脅，搞到港股一度滑落近千點，收市雖然跌幅略為收窄，但市場驚魂未定，大跌841點。
出完2000億美元清單要唞唞
特朗普政府四出攻伐，打完加拿大同歐洲，再對中國再出重招，推完500億美元徵稅清單，再聲言將制訂2000億美元下輪徵稅清單。內地對美國實行還擊，除咗收番入口稅外，仲指責美國揚言加碼係變本加厲，形容這種極限施壓和訛詐做法，背離雙方多次磋商共識。商務部回應話，如果美方失去理性出台清單，中方將不得不採取數量型和質量型相結合的綜合措施，作出強而有力嘅反制。
美國咁樣押注去「大」人，係特朗普一貫去到盡作風。根據他的邏輯，美國有成3700億美元貿易赤字，大家鬥列清單，最後中方必然冇美國咁多籌碼。過去特朗普做生意，經常十個茶壺九個蓋，經常係二仔底同人講數，有幾可自己銀彈多過人，O依家畀佢有機會大對手，自然絕不手軟，所以一時間搞到中港股市風聲鶴唳。
中美貿易戰升級，滬深股市齊挫，上證指數收報2907點，急跌114點；深成指數收報9414點，下瀉528點。內地股市急插，港股跌幅都唔細，港股低開後持續向下，恒指收報29468點，下挫841點；國企指數收報11492點，跌377點，成交大增至1530億元。
港股最多跌近千點，中環茶友問點睇，陸羽仁喺個市彈上31500點時，覺得個市都彈得差唔多，有胡可以食吓，等佢插穿30000點就考慮兜啲貨。昨日個市插得咁急，美國又來勢洶洶，市況都有啲嚇人。不過如果中短期而言，雖然唔排除個市有機會再下插，但如果特朗普連2000億美元徵稅名單都擺埋上枱，咁一兩個星期內，仲有幾兇狠嘅招數，可以馬上再出呢？外電都報道，特朗普向蘋果公司執行長庫克表示，美國政府唔會對在中國組裝的iPhone加徵關稅。呢個說法係庫克上月前往白宮見特朗普，當時佢對特朗普提及新貿易政策，可能對在華生產蘋果產品構成負面影響，特朗普所作嘅反應。雖然講法有啲過時，但都顯示特朗普會怕痛。
阿爺放水2000億人仔
表面睇，中國入口美國貨品都得1500億美元，美國加大徵稅範圍，中國係無辦法等額報復，但大家都知，中美貿赤中間有唔少水份，內地替美國企業代工生產，真正搵大水者係好似蘋果呢類美國跨國企業，若然將貿易戰無限量伸延，中國要對呢啲美國大企在華銷售開刀，咁對大家都無好處。O依家中美大家都向對方徵稅，等如大家駁咗一拳，美國再加注，中方最多只係口頭還擊，唔會主動出手，喺咁嘅狀況，特朗普係咪仲要出招呢？所以短期局面一係內地反擊雙方反枱，一係個市就見咗短期最壞消息，插完又會反彈一下。從博弈角度，我會估後者機會大啲，加上阿爺昨日都放咗水，央行進行2000億人民幣左右的MLF(中期借貸便利)操作，市場估計中央唔減息都會降準。如果有子彈又有膽，咁等佢再插都以可以考慮撈吓底。
陸羽仁
金融High Tea 舊文
來源 source: http://hdfin.stheadline.com