智取大市：同板塊點分強弱
■楓葉教育一年前港股通持倉得4.7%，最新已增至15.64%。 互聯網圖片
上一期講開揀零售股要行街睇嚇邊個多人幫襯，零售股顯而易見係最容易做Channel check嘅板塊。要分辨強弱股，從基本因素入手當然正路不過，但好似教育股咁樣，隻隻睇起上嚟差不多，業務
簡單但透明度不算高，大家好容易純粹從股價強弱去分辨邊隻好、邊隻唔好。
舊年新高教（2001）表現比較突出，楓葉教育（1317）明顯落後，以為股價反映一切？楓葉教育質素較遜色？點知今年後者就反先，升勢更強勁。教育股係新興強勢板塊，未經歷過潮退冇人知邊一間最終仍然著住泳褲。以往呢種情況，同一板塊隻隻股會齊上齊落，但而家可以前後腳咁炒，玩法的確隨時日有所轉變了。睇股價盲信強勢、弱勢，諗法的確要有所改變。
睇港股通手影，楓葉教育舊年呢個時間港股通持倉得4.7%，9月股價發力前升到6.75%，然後一路炒，港股通持倉比例一路升，去到最近係15.64%，北水掃高就大曬，潮退仲係咪著泳褲？未有耐潮退嘅話，炒咗先講。
基本因素強弱好清晰嘅板塊，睇嚟係手機設備股、科網手遊股等等。舜宇（2382）手機鏡頭主攻光學產品，即係鏡片，係鏡頭裏面技術要求最高嘅部份，至於高偉電子（1415）同丘鈦科技（1478）做鏡頭模組，技術含量冇咁高，面對競爭，業績走樣機會相對大。買強勢股定落後股？的確，每個板塊情況不同，要細心研究先得。
晉佳
http://fb.com/advanceguy1
本欄逢周一、三、五刊出
晉佳
智取大市 - 晉佳 舊文
來源 source: http://hk.finance.appledaily.com