阿爺放水 美國放火
2018年06月26日
內地降準抗股市逆流，初頭都頂得兩嘴，但消息多少喺市場已預先反映，加上美國再傳針對內地科技公司投資消息，中港兩地股市下午跌勢加劇，恒指終於插穿29000點心理關口。
總理李克強上個星期喺內部會議中提出，要放水支持中小企業，市
場周六都仲未聽到聲氣，以為可能要再等等。結果人行喺周日出招，宣佈調低存款準備金率0.5%。縱然時間有啲刁鑽，市場亦都有預期。雖然係咁，但中港兩地股市開市向好，恒指彈高超過100點，但上升幅度本來已經唔大，升勢其後更被扭轉，主要係市場關注《華爾街日報》引述消息指，美國總統特朗普計劃禁止很多中國企業投資美國科技公司，同時阻止對中國額外技術出口，措施將會針對新交易。
又傳針對中資科技公司
根據報道，美國財政部正起草規定會限制中資持股至少25%企業，收購涉及對行業影響重大技術的美國相關企業，投資禁令不會差別對待中國國有企業及私營企業。
有傳特朗普會再針對中資科企投資美國，應該唔係空穴來風，因為早喺今年三月，美國國會曾經舉行聽證會，當時包括美國參議院共和黨黨鞭科尼恩(John Cornyn)在內的議員，就提出設立一份「特別關注國」(Country of Special Concern)名單。呢個法案被理解成係為中國度身炮製，目標針對中國政府通過「中國製造2025」等政策，鼓勵中國企業在未來關鍵技術領域在美大幅投資。美國呢個政策起因，係上世紀八十年代日本經濟起飛，不但挑戰美國霸主地位，仲殺入美國收購，目標包括矽谷科技公司，當時美國通過修正案，授予美國總統在出現「可信證據表明外國利益控制會損害美國家安全」時，有權阻止外國企業收購美企。今次提出設立特別關注國就係一個加強版，當時有說法指今年八月會完成立法程序，屆時方案就會擺喺美國總統特朗普桌上。
《華爾街日報》講限制中資公司係咪同呢個法案有關仲要查探，但有跡象顯示特朗普想玩嘢，美國針對內地的鷹派就不斷幫佢調校炮口，轟向自己本來想向內地開刀的地方，喺內地未搵到高效反制措施，又或者同美國佬斟掂數前，日子都會幾難捱。
另外人仔下跌令股市受壓，人行宣佈定向降準後，人民幣昨天繼續下挫。在岸人民幣兌美元跌幅擴大，較上一交易日官方收盤價跌近400點子，離岸人民幣兌美元跌破6.54關口，日內跌超300點子，創1月10日來新低，連續八日下跌，創2016年以來最長連跌紀錄，八日內人民幣貶值超過1%。人仔下跌顯示資金無興趣留在區內。
阿爺放水暫時不敵特朗普放火，內地A股低開後收跌，上證指數收報2859點，跌30點，跌1%；深成指數收報9324點，跌85點或0.9%。恒指收市跌穿29000關，收報28961點，挫377點，跌1.3%；國企指數收報11208點，跌130點，成交1073億元。騰訊(700) 跌2.2%，收報388.8元；中國平安(2318) 下滑1.5%，收報74.5元。代表中資股的恒生國企基金(2828) 跌1.12%，收報114.5元。人行降準後，人民幣顯著下跌，借了大量外幣債務的航空股受壓，國航(753) 下挫7%，收報8.08元；南方航空(1055) 跌9%，收報7.01元；東方航空(670) 跌6%，收報5.68元，人行將來仲有可能會再降準，內航股股東都要小心啲。藍籌中唯獨中海油(883) 受惠油價回升，逆市急升2.4%，收報12.64元。個市跌到呢個位都有啲尷尬，因為氣氛咁弱唔排除再插吓，但佢穿低位隨時會有技術反彈夾番高。
同股不同權頭炮小米掛牌，撞正中美兩個大隻佬拗手瓜，首日招股市場反應麻麻。由於佢集資額大，雖然只有5%會公開認購，數目都有番咁上下，點樣搞熱氣氛都有啲考功夫。
小米要加把勁催谷
近年市場興玩用孖展抽新股，O依家部份經紀行佣金好低，全靠借孖展賺錢，所以逢抽新股都會催谷，好似小米呢啲有知名度的公司招股，正係搵食好時機，所以大家都想佢旺場，可惜佢招股前夕美國加息，拉高咗利息成本，大家都唔敢唱得太好。抽新股遊戲係旺者愈旺的遊戲，大家覺得中籤比例低，加大孖展率增加機會，就會谷到超額倍數愈高。相反，若然大家覺得中籤易，唔想買到成手係，咁就會減低入票。小米市值大，認購中籤比率高，就跌入咗呢個反向螺旋。通常呢啲市況基金都會借機壓價，對小米嚟講，上到市就係好漢，價錢多少可能都係次要，所以未來幾日都要繼續催谷，總之過咗海先可以做神仙。
陸羽仁
金融High Tea - 陸羽仁 舊文
來源 source: http://hdfin.stheadline.com