【財演算法】最近應該炒咩好？（蔡嘉民）
2018-7-17 8:45:58
中港股市6月大跌之後，好似唔多覺有力反彈，唔知「五窮六絕七翻身」嘅七翻身有無機會做倒呢？依家仍然係未知知數，要睇7月下半月表現如何，恆指暫時表現比起7月頭跌左大約1.4%，大市氣氛並唔太好。但美國就非常
精彩，納指不斷創新高，上星期四突破左6月中嘅歷史高位，星期五最高見7844點。今年暫時由年頭嘅6903點升到依家7826點，一共13%。所以筆者成日同朋友講，美股長揸係好過港股。點解美國好似同世界脫節咁，係咁衝上雲霄呢？
美國聯儲局最近發表左個半年報告，報告提到美國經濟好好，經濟活動、勞動力、通脹等等方面都符合預期，所以年內雖然已經加左兩次息，但仍然會加多兩次。跟據利率點陣圖計返個加息機會率出黎後，美國比較大機會會喺9月同12月嘅議息會議先後加多次息。但12月加息個機率大約係63%，反映市場未算係好肯定。如果閣下相信美國經濟數字繼續做好，可以考慮沽美債期貨，因為當市場肯定會加息嘅時候，美債會慢慢反映市場預期而下跌。
另一方面，筆者經常認為市場過度擔心貿易戰，中興(00763.HK)就不幸成為主角。所以市場對貿易戰嘅情緒，某程度上可以係中興嘅股價反映出黎。中興個勢似築底反彈，認為貿易戰唔會惡化嘅投機者可以考慮撈底，以上星期四嘅上升裂口底$12.8做止蝕位。
最後，就係近期好heat嘅小米(01810.HK)喇，上星期宣佈被納入富時中國50指數後，大升11.4%，再之前宣佈被納入恆生綜合指數後，升13%。但今日不被納入滬港通，而恆指入面得領展(00823.HK)1隻唔係滬港通成員，證明小米入恆指無望，短期未必再有被動基金追貨支持升勢，再度大升機會變低。
財演算法 - 蔡嘉民 舊文
來源 source: http://www.winmoney.hk