修風
圖片來源：pexels.com
努力到天翻地覆，開始可以為小小的成就而有點沾沾自喜的時候，面前就走過一位什麼也不用做便可以做幾億生意的「同事」。如果「努力」只有一個天敵，那想必是這些不勞而獲的人。你立刻會想：咁勤力做乜，人哋唔使做都得。不是很不公平嗎？他可以十點上班、十二點至兩點半
食 lunch、四點放工做 gym (佢當然話係見客)，但明早十一點回到公司也依然可以跟老闆說他成功做成了一單生意。
老闆讚他乖，說他行，但老闆當然知道他其實一點也不行，他只是有個億萬爸爸認識好多億萬朋友，定時定候「跌」兩三個億給世侄，便是一單生意了。做我們這一行，四圍都是這樣的人，見怪不怪。
外地公幹回來，一踏入公司已經有位同事急不及待想見我。看他樣子，怎會不知道找我為何事。我叫他陪我食晏，去遠一點食，順道在車上聊聊。車程裏講不停，是我講不停，偶爾問他意見，他不好意思轉話題。來到跑馬地，隨便泊在街上，走入一家拉麵店。叫完兩碗雞湯拉麵，我終於給他機會。點呀，有咩搵我？
這樣直接問，反而他不好意思說。好半天後，終於吐出那句「我想辭職」。點解？「我喺度做嘢覺得自己好蠢。」蠢？「蠢。」點蠢法？「人哋三兩下手勢就十個八個客，我做曬功課先有個見客機會，仲要埋唔到齋。」幾句話的弦外之音，在細小的拉麵店不停迴盪。
人各有志，既然想走，何必挽留。只是覺得，做了一年多便離開，有點可惜。這小朋友不錯，有火之外，還有一點傻勁，老土一句就是，我在他身上看到以前的自己。
覺得好唔公平？我問他。來不及反應的他，搔搔頭，訕訕一笑說：「少少，但我唔介意，有人嘅地方就有唔公平，我嘗試接受緊，不過仲需要時間消化。」唔介意又辭職？「唔介意唔代表鍾意。」Wow，呢句唔只幾型，係好型，其實他比葉朗更葉朗。
我剛入行的時候，公司有三條 Hong Kong team，只有一條 China team；嗰陣懶醒，同自己講，有得望梗係北望神州，選擇 China team，點知就係咁瀨咗嘢。我條 team 有個中間分界的內地人，佢老豆做嘅生意好奇怪，專賣飼養 jellyfish 嘅魚缸；英文其實係 aquarium，即係超級無敵大嘅魚缸，客戶唔係大公司就係大富豪；生意越怪賺錢越快，人哋身家買得起幾棟商業大廈。
很多年前，有天跟老闆準備第二天會議的時候，我忍不住泄氣的說了句，其實我都唔知自己係咪適合做落去。我以為這句會引起老闆的巨大反應，但他只是當閒話家常般繼續搭嗲。「點解唔適合？」呢行都唔係要求你做到嘢。「咁要求咩？」要求你識投胎。老闆大笑，我也忍不住笑，他知道我在說中間分界。
「覺得唔公平？」非常。「其實係公平，係你未夠成熟。」點公平？「佢有嘅嘢，你冇，但你有嘅嘢，佢都冇。」係，佢係冇我咁靚仔。老闆又大笑，我也忍不住笑。「佢冇 class，你而家都冇，但我睇得出你慢慢會有。」輪到我忍不大笑，佢冇 class？「你覺得佢有？」人哋對鞋幾萬蚊呀老闆，著咗青蛙都變王子啦。「你勉強可以話佢有 style，但唔係 class。」佢有 Jay Chou 演唱會唔睇，走去聽唔知邊度嚟嗰啲小提琴家演奏會，咁都冇 class？「如果你一定要美化佢嘅嗜好，你可以話佢幾有 character，但都唔係 class。」
所謂 class，在乎你怎去承受，在乎你不去計較。不是說蝕底一點做多一點這麼簡單，而是去承受就算做了很多也沒有回報，更不去計較別人的小器、謾罵、投訴、無知。我看過一個中國人上外國節目，討論大肚婆「坐月」的重要和科學根據。那個外國主持直情說「坐月」這說法是 rubbish，但那個中國人只是微笑，沒有道出「所以你哋咪老得咁快囉八婆」這個事實，只是繼續以純正英語表示自己的看法。Now you see，class 就是承受和不計較：承受是一種修為，不計較是一派風範。基於這個定義，我很少見過有 class 的富二代。那當然，除了承受和不計較，還有別的。
老掉牙的故事：從前有兩個酒莊，一個窮人營運的，一個富戶營運的。
兩個酒莊都有很多個酒桶，清洗完後，富戶的酒桶在一個玻璃屋內存放，窮人的酒桶露於室外。
每晚刮大風，富戶的酒桶動也不動，窮人的酒桶全被吹跌。
窮人的小孩嘗試把酒桶綑在一起，結果雖頂得住大風，卻被夜晚出沒的花貓撞得東歪西倒。
最後窮小孩想出辦法，就是清洗完酒桶，索性把水留在桶內，最後酒桶既能「承受」風的威力，也「不計較」花貓的滋擾。這個故事告訴我們，一個人要有很多歷練，才能不斷加大自己的重量。人有了這份重量，才展示得出修為與風範。
當你有天懂得為自己的重量而驕傲，你還哪裏來的閒情去羨慕別人的舒適？
來源 source: http://thestandnews.com
生活 - 葉朗程 舊文