財路：哈電炒兩個概念
■哈電有轉型加央企間重組概念，加上現價低過08年金融海嘯爆殘價，冷灶燒得過。 互聯網圖片
大行瑞信啱啱月頭寫咗份有超過25%升幅嘅股份報告，毫不起眼嘅哈爾濱電氣（1133）係其中一隻，現價仲要低過08年金融海嘯爆殘價！
呢轉瑞信點名包括哈電在內股份，以呢類股票基本面
良好，加埋價值吸引，建議收集。瑞信無詳細列明點吸引，不妨自己計嚇數。哈電現價2.46元，08年金融海嘯期最低位2.52元，哈電當時對應PB0.57倍，哈電現價PB，得0.25倍，比海嘯期仲要折讓56%，亦幾乎同97年亞洲金融風暴時0.22倍差冇幾！
哈電到上年尾手頭現金近162億元人仔，折約190億港元，長短期借款約74億港元，淨現金高達116億港元，若連埋今年頭，哈電以每股4.56港元，配發近3.3億股內資股，集資15億元，哈電手頭淨現金，係達到131億港元。又當你人仔貶值，去到1元人仔兌1蚊港紙地步，哈電淨現金，仍講緊過百億港元，超級現金牛。
又隨住國電集團同神華集團合併重組成國家能源投資集團，亦有分析話，重型裝備行業急需結構調整，重組可有效減少重複建設同惡性競爭，已經有分析員估計，可能涉及央企，包括中國一重、哈電集團、東方電氣集團等。再正路啲諗，哈電大把現金，又隨住內地實行環保國策，去煤化係大趨勢，哈電家陣仍然以火電為主，手頭大把銀彈，諗出路，亦係好正常。哈電有轉型加央企間重組concept。
呢轉趁殘冷灶哈電，以瑞信超過25%目標升幅做準，博哈電升30%到3.2元，PB都係得0.32倍。
錢雋
細價股專家
本欄逢周二刊出
錢雋
財路 - 錢雋 舊文
來源 source: http://hk.finance.appledaily.com