經濟客艙：
有種財長叫姆欽
■侵侵（右）愛鬥大同亂搬龍門，姆欽（左）總會跟侵侵唱雙簧，非常合拍。 資料圖片
香港有位「總會認同你的上司」嘅財爺，不解釋唔講你都識；花旗國有位「總會跟上司唱雙簧」嘅財長，他的名字叫姆欽，大家要好好學習佢英文名嘅發音。
姆欽周末跟侵侵合
演美元唱雙簧，侵侵於專訪透露對聯儲局加息唔太高興，又提到強美元令美國經濟處不利。姆欽出席阿根廷舉行嘅二十集團國峰會前，又有專訪指密切監控人幣滙率走勢，睇睇中國政府有冇操縱滙率，將人民幣轉弱情況納入《國際經濟和匯率政策報告》。
隔晚侵侵又喺社交網貼文，重申不滿歐元和人民幣持續貶值，削弱美國貿易優勢。呢個時候姆欽喺二十國集團峰會舉行前又同傳媒吹吹風。首先，要為主子撲熄火頭，重申侵侵對美元睇法，無意出口術幹預滙市，也絕不幹預儲局貨幣決策獨立性。
姆欽同侵侵合拍度，絕不可以低估。當美國有一位愛鬥大同亂搬龍門嘅總統，也要有位智勇相當嘅財長配合。姆欽為侵侵強美元言論解畫，自去年特朗普上場後曾出現過，姆欽解畫能力一次比一次出色。侵侵對美元嘅意見，唔係想針對儲局嘅獨立自主性，而係唔好忘記侵侵係美國總統，又係一名地產商人，梗係日日睇實息率走勢啦，咁又點會唔關心美元去向先。姆欽呢招身份互換概念，跟主子處理國際問題時亂搬龍門絕對有得揮。
地產商人侵侵也懂得利用傳媒同媒體影響力，喺貿易問題上借力打力。中美貿易談判陷入僵持局面，美國利用獨家專訪向中國及其他貿易夥伴國拋一拋浪頭，也有一個比貿易戰嘅訊息令大家更擔心，想打出貨幣戰呢隻牌，強調係想打，並非真係打。
侵侵不理總統身份都要話儲局加息刺激美元走強，影響美國貿易優勢，確實弱美元對美國更有利，起碼維持美國出口業競爭力。儲局繼續加息進程，係刺激美元上揚一個重要因素。同時貿易戰開波後，逐步見到資金回流向美股同美元，也很難令美元維持弱勢。美國要喺二十國集團峰會舉行時候擺擺姿態，派姆欽跟英、法、德、加拿大同日本傾傾數，亦為美國及中國貿易僵局，爭取更多有利條件。
Captain Cool
經濟客艙 - Captain Cool 舊文
來源 source: http://hk.finance.appledaily.com