智取大市：比騰訊好的選擇
■閱文PE雖然遠貴過騰訊，但擺明處於增長期，有機會低撈時，揀騰訊就不如揀閱文。互聯網圖片
投資者分好多種，有人但求安安樂樂維持原狀，大可以買公用股、高息股，呢類多數係成熟企業，同時產品係生活必需品，可見將來冇被淘汰嘅可能性。不過，總有大把人覺得要改變生活現狀
，由貧變富，只有增長股能夠帶來希望，其次high beta周期股就係別人恐懼我貪婪嘅選擇。
騰訊（700）最大嘅問題，大家都識講係搵唔到增長點，更致命係佢賣緊2018年PE32倍，呢個估值大概係2014年、2015年嘅價，騰訊史上並非特別平，𠵱家仲要基數大咗，長遠增長空間細咗，更加唔值。騰訊暫時唔係一隻畀到龐大增長希望嘅股份，就算長遠喺內地AI、IoT尋找到新增長點，亦非呢個時候去反映。
騰訊旗下閱文（772）又點？2018年賬面PE40倍，扣除非經常性嘅其他收益同上市時利息收入，稅前盈利大概少三成，經常性盈利計出嘅PE，略低過60倍，當然遠貴過騰訊。好就好在佢擺明處於增長期，喺行政開支維持平穩之下，毛利升24%，經常性稅前盈利大概升超過六成，經營槓桿高，新收購新麗傳媒實在唔差，有Synergy。閱文基數唔高，亦有個希望賣到畀你，雖然睇個勢佢同騰訊繼續跌，但有機會低撈時，揀騰訊，就不如揀閱文了。
晉佳
http://fb.com/advanceguy1
本欄逢周一、三、五刊出
晉佳
智取大市 - 晉佳 舊文
來源 source: http://hk.finance.appledaily.com