阿爺擇日放老外入市
2018年08月17日
騰訊(700) 周三收市後公佈較預期差的業績，市場嚇到面青，夜期一度急插近500點，港股明顯低開後反彈，一度倒升，但市場人心始終虛怯，最終大市都跌223點，跌近27000點收市。
雖然大市氣氛咁弱，但都唔係無好消息，內地公
佈修改後的《證券登記結算管理辦法》和《上市公司股權激勵管理辦法》將於2018年9月15日起正式施行，同時中國證券登記結算有限公司，將出台有關外國人開立A股證券帳戶的實施規則。證監會早前公佈擬增加兩類人員的A股開戶資格：一是在境內工作的外國人；二是A股上市公司中，在境外工作並參與股權激勵的外籍員工，呢個措施O依家落實有期，明顯見到阿爺想托市，對A股有利。不過人民幣持續弱勢，市場對好消息反應遲鈍啲，所以滬深股市繼續下滑，上證指數收報2705點，跌18點；深成指數收報8500點，下滑80點，當中滬指再創近兩年半新低。阿爺擇定好日子，落實放寬措施，看來有托市意圖，但好消息都要等適合時機先發揮到作用。
中美傳將重啟貿易談判，加上沃爾瑪次季季績勝預期，帶動美股昨晚升番不少。杜指中段曾升三百九十一點，見二五五五四點；納指升六十三點，報七八三七點。
人民幣趁勢反彈
另外，市場憧憬中美重啟貿易談判，人民幣中午升幅擴大，離岸價午後兌每美元升越6.88，高見6.8741，單日勁升逾700點子或1%；在岸價亦曾升近6.88關，高見6.8811。
股市呢輪咁波動，陸羽仁有機會同中環股樓女強人飯局，問起前景佢點睇？女強人話佢最關注係美息上升，呢個因素仲緊要過樓市辣招或其他政府措施，所以早排佢已經大減磅，呢排主要係吃喝玩樂，仲安排咗隻私人飛機接載成班老友去玩，皆因沽貨套現後都唔心急入貨。既然唔入市住，不如唔好睇咁多，去消費散吓心，好過日日望住個市波動。
股樓女強人︰樓市跌緊啦
女強人大把錢，早幾個月先掃咗批寫字樓，但佢坦言對住宅樓市有戒心，直言「住宅樓市跌梗啦！」佢講完，喺佢身邊嘅助手就加多句，呢排龍頭發展商喺九龍西推出個住宅盤，價單就調低咗一成左右，雖然發展商強調唔係同一批單位，價錢唔可以直接比較，但發展商開價唔敢咁進取，已經係對市況一個證明。
另一個證據係日前開標的港鐵油塘住宅地，結果由中資保利(119) 以33億元中標，屬市場下限價，同時係近期九龍地罕有呎價跌破一萬元。女強人話，雖然O依家本地銀行未加最優惠利率，但銀行間的拆息同按息已經上調。
如然按息升到四厘，咁對樓市就會有明顯衝擊。O依家市場仲未有強烈感受，主要係好多業主用拆息供樓，但同時有用最優惠利率做基準的封頂條款保障，所以拆息O依家升咗，供樓人士負擔仲未直接加重，若然稍後最優惠利率上調，咁就心理同實質影響都會出嚟。
女強人提到保利置業力壓其餘九個財團奪得地皮，項目為港鐵通風樓上蓋，中標價等同樓面呎價9257元，稍低於市場預期；但相比兩年前，同區一帶的觀塘茜發道用地，當時由會德豐地產以呎價7729元奪得，是次樓面呎價則高出約20%；若相比同樣在兩年前，五礦地產以樓面呎價7068元奪得油塘崇信街地皮，更高出約30%。聽熟悉呢幅地嘅招標人士解釋，項目雖然係地鐵項目，卻只係附屬設施用地起樓，唔係上蓋物業，前往港鐵油塘站須約10分鐘步行路程，而且起樓有啲特別要求，成本較高，加上有通風口，都影響咗標價。
雖然係咁，呢幅地本來有兩個賣點，一是屬區內可「即買即起」的住宅地，二是項目可建約500至600伙，並主打中小型單位，呢類特殊因素項目風險高啲，行情上落大啲，回報好睇開售時市場氣氛。所以今次結果唔可以話好差，但都唔係好靚仔。
盈富中企佔沽空榜首
睇番港股連番下跌，主要都係跌啲高估值股，磚頭股暫時仲未有好大影響，好似太古B(087) 仲繼太古A後創出新高，但咁反而要小心。
昨日恒指收報27100點，跌223點；國企指數收報10479點，下滑55點，成交1245億元。同時沽空金額有164億元，沽空比率13.18%，當中盈富基金(2800) 沽空有11.15億元，佔6.8%；恒生中國企業(2828) 沽空8.27億元，佔5%。騰訊喺績前連日被質，壞消息公佈後股價一度再跌5%，收市挫3%，收報325.8元，同系閱文(772) 收報49.85元，再插5%。
另外，萬洲國際(288) 股價急挫7.5%，收報6.08元，內地媒體報道，萬洲國際旗下鄭州雙匯食品的屠宰場，發現有豬隻感染非洲豬瘟死亡，結果肉價上升，佢由得益者變成受害者。
陸羽仁
金融High Tea 舊文
來源 source: http://hdfin.stheadline.com