財路：國際資源勝在錢多 - 錢雋
國際資源上周五發盈喜，嚟緊半年度，盈利會增長超過70%。 互聯網圖片
國際資源（1051）啱發盈喜，有得炒嚇業績之餘，集團揸住勁厚銀彈，點運用，亦係憧憬所在。
國際資源發公告，話金融資產升值，所以，嚟緊半年度，盈利會增長超過70%，國際資源有靚仔業績之餘，
仲要咁睇，國際資源到上年尾，揸現金7.8億美元，折約61億（港元·下同），又冇借款，相當每股淨現金約0.27元，手頭大把銀彈。
今年中，國際資源原先大股東中譽（985），將所揸國際資源14.13%權益，賣俾PX Capital Partners，每股作價7仙。若果國際資源要免本揸呢版貨，派送特別甜品係最直接方法，呢期有靚仔業績，會唔會順勢咁做？
排除呢個可能，講過係，有關方面已經緊釘，就打擊殼股活動進行咨詢，兼加強養殼難度。對以往淨現金公司，或者冇業務嘅細價股，仲keep喺市場上市難度亦都增加咗。隨住條例越修越嚴，場內所有股仔，一定要有核心可持續營運業務。
國際資源有大把銀彈喺手，進行業務壯大，已經有壯大優勢，隨住新主上場，有大搞作，亦係好正常憧憬。
再講，PX Captial繼上邊大手一版，之後亦不時增持，由原先14%上到家陣22%，最貴一版講緊6月尾時0.1元，買入18.4億股，國際資源現價8.4仙，比PX Captial呢板增持成本，平咗16%。憧憬國際資源有甜品派送，博新主將國際資源湊大，全部合情全理。
國際資源上番到每股淨現金值0.23元，現價都講緊要升187%，但目標價PB仲仍然有0.58倍。
錢雋
細價股專家
本欄逢周二刊出
財路 - 錢雋 舊文
來源 source: http://hk.finance.appledaily.com