一路一帶：LeBron Effect有幾勁？
■勒邦占士前日喺家鄉俄亥俄州Akron市成立的慈善小學主持開幕演講。資料圖片
NBA球星勒邦占士（LeBron James）前日去到佢家鄉俄亥俄州Akron市，宣佈會成立一間慈善小學，為低收入及有障礙的兒童提供免費讀書機會。「占王」今個夏天
轉會到洛杉磯湖人，為其球員黃昏生涯鋪路，腰纏萬貫嘅佢冇諗住喺加州點樣過住奢華生活，而係繼續為社會做貢獻。
占士今次建立嘅小學叫I Promise School，免學費係基本，會包埋校服費用、免費單車及安全頭盔、兩里內的免費交通校巴服務、免費早餐、午餐及小食、供學生家庭使用的食物廚房及倉庫、托管及就業安置服務，Akron市學童會保證免大學學費。基本上令到該市學童可以無後顧之憂地專心讀書。Akron公開學校就向記者表示，有障礙及低收入家庭的學生喺該學校就有高達120人。I Promise School喺下一年會加第二級同第五級學生，到2022年，就會包辦第1至第8級學生。
筆者好奇占士究竟一年有多少收入，才會開辦一間不停燒錢嘅學校？睇返福布斯2018年十大最高收入運動員排行，占士排第6位，係全世界吸金力最強的籃球員，排佢前面有3位足球員，分別係第2位嘅美斯、第3位嘅Ｃ朗同第5位嘅尼馬。最高收入嘅係新拳王Floyd Mayweather，第4係另一位拳手Conor McGregor。
占上喺2003年以狀元身份進入NBA球隊克里夫蘭騎士，就同Nike簽咗7年合約，代言費用高達1億美元；2010年再續約，每年費用高達2,000萬美元，如果占士轉會去紐約、洛杉磯或芝加哥等大城市，每年代言費會加多500萬美元。占士其他代言費不菲，例如有可口可樂同Intel。至於最有投資價值，就係08年代言音響品牌Beats，費用係Beats公司大約1%股份，到2014年Apple用咗30億美元收購Beats，占士所持股份價值3,000萬美元。2011年佢投資650萬美元買入英超足球隊利物浦2%股份，現時市值已升至3,200萬美元。
講返占士過檔洛杉磯湖人嘅人工，雙方簽約4年，年薪高達3,850萬美元，4年合約總值1.54億美元。有大學金融教授統計過，占士嘅名星效應，會為佢效力嘅球隊所在城市帶嚟額外經濟效益，仲改咗個名叫做「LeBron Effect」，例如過去佢為克里夫蘭市已帶來5億美元經濟效益，預計未來4年會為洛杉磯帶來4億美元經濟效益，當中主要係球賽門票收入、當地酒店、餐飲及旅遊收入等等。
喺可見嘅將來，占士即使退役，佢單靠代言等廣告收入，可以同籃球之神Michael Jordan同萬人迷碧咸咁，瞓住喺度都有錢收，開多幾間學校都唔嫌多！
斯郎 fb專頁
https://fb.com/oneroadonebelt/
斯郎
一路一帶 - 斯郎 舊文
來源 source: http://hk.finance.appledaily.com