中美埋牙掀陣痛
2018年08月02日
外電喺上日美股交易時段爆料，話中美兩國官員正在傾密偈，為重開貿易談判摸底，美股借勢造好，不過美股收市後再傳消息，話美方為加強施壓迫中國談判，準備提高之前話要制裁2000億美元中國貨的關稅稅率，由原本加10%變成25%。消息一出，美股期
貨即回，人仔匯再插。
隨後港股高開後回軟，午市跌勢加劇，指數大幅向下。美國官員放到消息滿天飛，市場人士聽到頭擰擰，感覺好似日本大導演黑澤明的猛片︰亂。
內房股再受政策衝擊
在外電爆料前，有政經猛人已經收到料，話北京正同美國摸緊底，估計未來幾個月會係頻繁接觸期。中美兩國互動，從時間上來說好正常，因為美國11月就進行中期選舉，O依家已經踏入八月，美國呢個時候仲唔出招等幾時。猛人認為兩國招來招往，有可能喺兩至三個月內達成協議，但就算傾出結果，內地都唔容易啃。美國佬呢次動真格，要畀顏色中國睇，中國可以還招的地方唔多，最後可能都要被迫接受，但代價唔會太細。作為挑戰老大的阿二，只能夠臥薪嘗膽一味忍，否則日子更不好過。
如果按照猛人所收的料，美國O依家放出消息，話不排除提高關稅稅率，係為談判增加籌碼施壓。中國方面則暫時無乜具體回應，美國目前實力仍然遠超中國，喺咁嘅環境低調，可能係最好的應對方法。由於中美貿易關係仍然處於不穩定狀態，就算話談判重開，都唔代表有好結果。美國自特朗普上台，打出「美國優先」旗號後，國際關係變得超現實，有點重回昔日西部牛仔色彩，一有唔妥就鬥拔槍，任何協定都好脆弱，相信直至搵到新的利益平衡點前，呢個狀況都唔會改變。
市場對好消息偏向審慎，對壞消息反映強烈，美國加強施壓，引發中港股市再出現強烈陣痛。內地股市全線回調，上證指數收報2824點，跌51點，跌1.8%。港股早段上升，但午市開始轉跌，最多下跌超過300點，恒指收報28340點，跌242點，跌0.9%，跌幅少過內地；國企指數收報10973點，下滑51點，成交904億元。雖然指數尾市跌幅略為收窄，但唔肯定係咪托沽。美國科網股回勇，騰訊(700) 一度略為反彈，但午市再跌，收市微挫0.2元，收報355元。
昨日重災區係內房。板塊下調跌嘅解釋，係深圳市政府發佈樓市新政，進一步加強房地產調控，觸動內房A股跌勢。根據規定，深圳暫停企業單位、社會組織等法人單位購買商品住房；個人、企事業單位或社會組織等法人單位，新購買商務公寓，自取得不動產權登記證書之日起五年內禁止轉讓；居民家庭新購買商品住房的，自取得不動產權利證書之日起三年內禁止轉讓。喺消息衝擊下，作風愈進取的股份跌得愈甘，好似融創中國(1918) 急挫逾9%，收報23.15元；碧桂園(2007) 都跌6.6%，二、三線的新城控股(1030) 插咗近10%；龍光地產(3380) 挫6.4%。
維他奶爆炒網購概念
喺弱市中，維他奶(345) 急爆5%報29.45元。佢喺內地的網購業務增長迅速，成為內地消費概念，喺高增長憧憬下，市盈率炒到去53倍，市值超過300億元，但內地市場咁大，炒作起嚟想像空間可以好大。另一隻同得仕(518) 準備賣廠刺激股價急升18%，報83仙。同得仕近年生意虧蝕，但市值不足四億元，管理層披露得賣廠，相信已經好事近，博短炒宜等佢回落先至郁手。
陸羽仁
金融High Tea 舊文
來源 source: http://hdfin.stheadline.com