【水能覆舟】與劉鳴煒的一面之緣（渾水）
全城取笑劉鳴煒Package Lau，我唔算認識佢，連點頭之交都算不上，只係同佢私人飯局食過一餐飯。
飯局係一個做智庫嘅朋友安排，喺灣仔一間食素嘅地方，約嘅地點相對humble，尤其是灣仔咁多富豪飯堂，呢個都算係給阿劉生的Credit。當時我25
歲，係飯局入面最年輕嘅人，其他人都係叔叔姨姨嘅年紀，目測至少35歲或以上。
餐飯食咗差唔多三粒鐘，成班中年人當然講自己啲政治理解，同埋當然講下依家啲年青點樣點樣，啊劉生都有講下自己點樣接觸年青人之類。
我涵養極高，忍咗成餐飯都冇講過一句說話，然後有一位同道中人開始放暗箭：「唔好話年青人，好似我呢啲中年人對生活都冇乜要求，一年去到兩次日本我就已經好開心㗎啦。」嘩！正呀，我本來神遊太虛嘅魂魄即刻返咗嚟，然後啊劉生係微微一笑。
大家見我成餐飯冇出聲，就問我有咩意見。我可以有咩意見啫，我都算幾老實不客氣，有果句講果句：「大家成餐飯講咗好多年青人點樣點樣，覺得年青人點樣點樣，其實呢餐飯已經有一個年青人喺度，就係我，點解你地又唔多點問下我？不如等我真正話俾你聽年青人到底係點樣點樣……」然後開始講咗5分鐘自己嘅見解，我冇講政治，仲講得好溫和，但我幾肯定我嘅觀察同諗法一定比呢班人中肯。然後劉生都係微微一笑。
隔左冇耐，劉生就有急事離開。然後我就冇再見過劉生，亦都冇機會再同佢食飯，當然我亦都唔希罕，我又唔係要巴結權貴，何況我比較鍾意有格調嘅權貴多啲。25歲嘅我比較直接，查實我嘅態度已經盡量溫和了。今年我27歲，我諗我都係會講返同樣嘅嘢。
劉生想做特首嘅心，昭然若揭，政治圈子私底下對佢嘅評價好高，好多人都覺得佢謙虛有禮貌，只係出嚟講嘢成日都出公關災難咁解。佢係需要年青人組班底，如果你想巴結權貴，又唔介意逢迎一個咁另類嘅上司，我諗你可以喺佢身上搵到機會。只係佢果一種另類，唔係咁容易令人招架得住。
水能覆舟 - 渾水 舊文
來源 source: http://hk.finance.yahoo.com