智取大市 - 晉佳 2018年8月8日
智取大市：反彈撈好定沽好
■近30年港股裏面，就算乜嘢熊市都好，跌夠半年總有個反彈浪。 資料圖片
上期講到，個股單日反彈幅度，要遠超之前個股單日嘅2至4%跌幅，先算係具意義嘅反彈力度，近期跌得深嘅教育股、物管股，如新高教（2001）、雅生活（3319）單日急彈能夠收復之前3日陰燭，力度算頗強。
有貨幾時甩手？冇貨撈唔撈好？不妨將策略統一化，以周一收市價作為止蝕價，如果市況繼續彈，但你手上隻股仍衰到潛低過周一收市價，證明係超弱勢，你同佢分手合理不過。若然今日勁彈過後，隨即見光死，A股斬倉潮仍陰魂不散嘅話，集體跌低過周一收市價，弱到咁一樣要避。
如果大市同持貨嘅股價一直冇跌穿周一收市價，或許值得一直持有整個8月。人行參事盛松成講明人仔保7，美國徵2,000億美元中國貨25%關稅亦難以喺8月尾公眾諮詢順利過關，呢兩方面消息短期內難以將後市質低。現階段持貨，係博8月冇其他方面嘅重大壞消息。
即使博8月反彈，策略上仍以增長股較秤先，一嚟為可能博失作兩手準備，跌市往往以增長股較硬淨。加上8月踏入業績期，增長股業績出現驚喜嘅機會，亦會較周期性股份為高，更值博。近30年港股裏面，就算乜嘢熊市都好，跌夠半年總有個反彈浪，睇嚇歷史能否重覆。
晉佳
http://fb.com/advanceguy1
本欄逢周一、三、五刊出
晉佳
智取大市 - 晉佳 舊文
來源 source: http://hk.finance.appledaily.com