穩字當頭
2018年08月08日
人仔匯價喺阿爺出招後繼續企穩，內地A股終於出現強勁反彈，帶動恒指再升。
大政趨鬆 地產例外
港股呢舖反彈，主要係美國暫時無再出手打壓，北京維穩措施亦發揮安撫人心作用。陸羽仁細讀7月30日中央政治局開會後的報告，見到中國未來政治經濟路
向，主要有幾點。第一，在中美貿易戰情況下，要「穩」字當頭。去年七月的政治局報告中，有15次提到「穩」呢個字，今次更提咗18次，就係要穩住中國經濟發展大勢，防範金融及經濟風險。
第二，既然「穩」字當頭，貨幣政策又會趨向寬鬆。未來可能要加大力度放水，但同時盡量保持去槓桿，所以預計水要放到與實體經濟，特別是小微企業相關環節，而唔係益晒大企業，特別係房地產企業，以免推高樓價，影響民生。
第三，財政政策會變得比較積極，包括所謂「補短板」做法，即對於一啲中國發展比較落後嘅領域，會加大力度投資。傳統有效支持經濟的方法例如基建，同樣應該會大力進行。另外，科技投資相信都會絕不手軟，透過財政開支，有導向催谷經濟。
內地政策講究大方向，我覺得這份報告大方向是趨向寬鬆。唯一緊嘅地方係調控房地產，對中港股市都有指導作用。O依家要刺激經濟，一定要重新搞基建，好似鐵路、基建股就比較受歡迎，昨日中交建(1800) 升咗3.8%，中鐵(390) 亦升3.2%。
另外，喺中央出手維穩後，恒指重上28000點關，收報28248點，升429點；國企指數收報10866點，漲164點，成交890億元。內房股跌得勁彈得勁，跌市中發盈喜的中國恒大(3333) 急升21%，碧桂園(2007) 都急漲6.4%，收報11.6元；融創中國(1918) 飆升8%，收報23.7元。
公佈業績靚仔的九龍倉置業(1997) 收升3.6%，收報57.4元；恒生(011) 升3.3元，收報212元。大市上到28000點，阻力會增加，能否繼續反彈，都要跟住外圍同埋中美貿戰發展走。
大市除咗A股領漲外，投資者另一關注係港鐵(066) 停牌，傍晚公佈高層大變動消息。行政總裁梁國權提早退休，工程總監黃唯銘就辭職，主席馬時亨就不會續任，他自言曾兩度請辭未獲政府接納，大地震程度比起之前高鐵超支有過之而無不及。
根據港鐵已提供的資料，出事的沙中線紅磡站最新報告，同先前提交嘅報告唔同，缺少近2000個用來鞏固鋼筋結構的螺絲釘頭，令政府無法相信總體螺絲釘頭數量符合要求，因此對沙中線團隊已經失去信心，故要求大換班。雖然管理層力撐無跟足圖則符合安全，但港鐵董事局喺緊急會議後接納咗要求。
股價升消息未曾反映
睇返短鋼筋事件發展，由最開始有人爆料，港鐵董事局主席馬時亨直言被蒙在鼓裏，及後爆出的料愈來愈多，政府同港鐵急急應變，當時佢哋開始小心翼翼，唔將件事攬上身，只係成立獨立委員會作出調查。最新發展似乎係有港鐵高層管理違反誠信，用港鐵主席馬時亨之前的講法，若然係咁隨時有可能係涉及刑事，後果相當嚴重，所以港府最新取態係劃清界線，向港鐵投不信任票，要求調查管理層。
喺昨日停牌前，港鐵收報42.8元，仍能隨市上升0.6%，反映消息似乎無外洩，亦可以話未曾反映。從事發至今，港鐵股價只係跟隨大市回落，市場想法係港鐵在本地運輸網絡地位牢固，地位唔係咁易動搖。以目前事態，往後發展有幾項關注，首先自然係首當其衝的高層管理責任，特別係當中有無人涉及刑責；再者係包括政府官員在內的董事局成員責任，跟住就係港鐵公司的管治。
暫時睇嚟，港鐵喺本港的運輸同基建角色，仲係不易取代，從兩度挽留馬時亨來看，政府同董事局仍然繼續合作穩住局面，但係今次事件造成的損失就好有可能要負責，未來地位亦會受外界質疑，如何拆解好睇接手者處理的手腕，所以對股價影響雖然未到摧毀性，但都會有一定打擊。
陸羽仁
金融High Tea 舊文
來源 source: http://hdfin.stheadline.com