恒大業績料靚仔
2018年08月24日
中美貿易談判開波，不過雙方齊齊擺出強硬姿態，中方官員繼續強調，不會犧牲任何代價爭取協議，連香港外交部的駐港特派員都加入戰團，最後見到兩國首輪第二段加160億美元貨品關稅如期進行，大家都知談判結果好極有限。不過加徵關稅消息昨日中午傳出
後，恒指跌幅不增反減，唯一解釋是市場預左無料到，無期望亦無失望。
特朗普上任以來，不斷受兩黨精英份子狙擊，佢一直成功過關，憑嘅就係不斷推出民粹政策推高人氣，O依家佢俾戰友擺上枱，有可能又再搞啲爭議性招數分散視線，為自己減壓。通常要有懾人效果，好事唔係咁易做得成，砌人就最直接，若然係咁就要睇邊個會中招嘞。
利豐息高本無歸
中美談判之間加碼制裁160億美元貨品，但內地股市午後轉跌為升，上證綜指最後收升0.4%，唔知係唔係阿爺維穩。港股上午曾跌過200點，下午跌幅跟A股收窄，恒指收報27790點，跌137點；國企指數收報10814點，下滑35點，成交僅840億元。平保(2318) 股價連升五日，繼周三股價急升3.5%後，昨日逆市再升1.79%，報74.1元。
過氣成份股利豐(494) 公佈上半年業績由盈轉虧，虧損8503萬美元，撇除應付或然代價重估收益的經調整純利5000萬美元後，上半年核心經營盈利1.24億美元，按年跌18%，由於供應鏈解決方案業務收入及毛利下跌，以及數碼化投資持續。持續經營業務每股盈利4.6港仙，中期息派3港仙。壞消息拖累股價急插15.5%，收報2.51元。利豐第一季宣佈連特別息每股派近五毫，若然貪息買入，O依家就輸凸一大截，真正係「利大本無歸」。
內地政策繼續制約樓市，但呢排內房陸續公佈業績，普遍仍然唔錯。昨日到中國海外發展(688) 派成績表，上半年盈利232.2億元，按年升7.2%。扣除投資物業公允價值變動，核心盈利191.7億元，按年增14.3%，中期息派40港仙。公佈完午後倒升，收報24.45元，升1.4%。
中國海外增長數字唔算差，但若同龍頭民企內房好似碧桂園(2007) 、恒大(3333) 比就慢左啲，陸羽仁啱啱同內房高層交流佢地嘅營運心得，就請內行人比較吓兩者的投資價值。
內房高層話，中國海外係國企，最大優勢係拿地，有條件拿到優質又相對便宜的地皮，利潤率高，所以這類公司最大優勢是穩健。同國企比，民企作風靈活進取，能夠因應環境不斷調整策略，壯大實力，由於佢地經過淘汰篩選，龍頭公司都好打得。過往中國海外曾經是賣樓最多的內房商，但近年排名接連被爬頭。
民企內房作風靈活進取
現時內地賣樓最多的「千億俱樂部」有十多個會員，中國海外仍能躋身其中，但排名已跌至五強之外，甚至有國企成份的萬科(2202) 戰績都有點弱化。
現時內地要數進取的內房商，有恒大、碧桂園，還有後進的融創，但融創老闆孫宏彬個性好冒險，股價波動更大。
高層話，早前碧桂園公佈左不俗業績。恒大董事會就議決截至2016年及去年12月底止兩個財政年度，宣派每股股息1.13元人民幣，由於佢大手派息，加埋上半年賣樓數字再上，可以估計佢下周二公佈嘅上半年業績應該都好強勁。恒大昨日收報28.8元，逆市升左2%。
陸羽仁
金融High Tea 舊文
來源 source: http://hdfin.stheadline.com