美圖中國IG夢高風險
2018年08月29日
美國同鄰居墨西哥達成貿易協議，美股再度大升，杜指勁升259點，標指同納指同創新高。港股因為周一已經大升，昨日只係升番80點。
港匯弱港股無力水
美國同墨西哥就北美自由貿易新協議有結果，相反同中國嘅談判就膠着。中美雙方先
後放話，11月美國中期選舉前都唔係傾偈好時機。噚日美國國務卿蓬佩奧話收到北韓挑釁，繼而取消訪問平壤，呢單嘢特朗普又入左中國數，認為北京喺北韓搞局。特朗普班子天天新款，美股就繼續創新高，睇嚟美國政客會繼續樂此不疲。
恒指雖然跟住美股高開，曾飆308點，見28579點逾兩周高位，惟內地股市回軟，港匯又持續疲軟，金管局再承接港元沽盤，令周四(30日)本港銀行體系總結餘降至763.5億元。港股後勁不繼，升幅不斷收窄，午後曾倒跌36點，收報28351點，升80點，重回50天線(28344) ；國指收報11097點，升48點，成交金額905億元。
藍籌新貴申洲國際(2313) 周一公佈業績後表現波動，大和最新上調目標價至108元，周二發力向上，曾升8.5%，見103.6元創新高，收市升5.4%，報100.6元。內房股普遍向下。外電日前引述馬來西亞首相馬哈迪表示，唔會允許外國人喺森林城市項目中購買住宅。碧桂園(2007) 回應話，已核實當局從未禁止向外國人銷售森林城市項目，惟股價挫3.29%，收報11.74元，為表現最差藍籌。
防物管股成沽貨目標
另外，物業管理股明顯跑輸，彩生活(1778) 挫8%，收報5.62元；雅生活(3319) 跌5%，收報13.28元；綠城服務(2869) 挫4%，收報6.18元，要小心呢個板塊又成為沽貨獲利新目標。
最近唔少公司宣佈業績，股價跟隨成績表上落。騰訊公佈業績倒退後，股價喺壞消息見光後持續反彈，但另一隻公佈中期業績的美圖(1357) 就持續受壓，主要係公司早前講到好似就快有錢賺，結果公佈業績仍然蝕錢，管理層呢次失晒分，令投資者相當失望。加上喺業績公佈前，股價已連番下跌，令人懷疑有春江鴨場先沽貨，好多買入者，惟有斬纜止蝕。
最令人擔心嘅係，美圖旗下美拍月活躍用戶大跌56%，公司坦言正經歷轉型，計劃喺未來18個月內加大投資力度，建立一個活躍社區，實現用戶和毛利雙增長。呢個計劃九月就會推出，所以未來幾個月，對美圖前景都幾關鍵。
以做改圖軟件起家的美圖，講到有心做中國版的Instagram。今個月美圖公司就喺北京召開戰略轉型發佈會，計劃打造以美圖秀秀為核心的社交平台。管理層揚言，Instagram退出中國，正為公司提供機會。
雖然美圖提出要做中國版IG，但市場就對上半年整體月活躍用戶按年下降憂心忡忡，期內美圖秀秀用戶下跌16%至3.5億，其中美拍成為重災區，月活躍用戶按年下降56%。為左扭轉情況，公司準備九月新版美圖秀秀將正式上線，據聞公司已經定出左高指標，甚至唔排除用補貼催谷用戶。
美圖自上市後曾經有大媽狂炒，之後股價喺高位爆破，如今輾轉跌左75%，公佈業績後股價急插完，喺四元水平浮沉，昨日收報4.07元。美圖想做中國版IG，但營運社媒難度好大，首先要做到有大量人流已經好難，唔好忘記內地好多競爭對手超級強大。其次即使做到相當人流，但人流變現而唔趕客，難度亦都好高。簡單來說，對美圖呢個大計唔係太有信心。
強如facebook係美國社交媒體一哥，都有老化威脅，但由於佢有壟斷優勢，一早買起對手IG，美圖管理層無fb教主朱克伯格的先入為主優勢，又無他的財力同深謀遠慮，講轉型唔係話咁容易。美圖市值仍有170億元，而在手現金有30多億元，未來股價食粥食飯，就要睇下個月推出的新版美圖能否叫好叫座，都係頗高風險的行為。現在大市跌左落嚟，好多股份都跌到一年低位，要撈底也不一定要博美圖。
陸羽仁
金融High Tea 舊文
來源 source: http://hdfin.stheadline.com