智取大市：餓狼搶錢定避險 - 晉佳
喺中美打緊貿易戰之際，日股能夠向上突破，證明撇開貿易戰因素，環球市底未算太差。 資料圖片
美股之所以跑贏環球股市，其中一個原因係佢發動貿易戰之時，其他國家仍以過去幾十年嘅和平思維去同今日嘅美國相處，於是美國出拳傷及中國，中港股走弱；而中國出拳只係隔
靴搔癢，比較之下，美股自然吸引資金流入。
美股一個可能嘅轉捩點，就係喺中國冇得大美國2,000億美金進口貨品關稅之下，會唔會使出真正到肉嘅招數。執筆時仍未有確實消息，港股黑期明顯觀望，市傳中國限制出口零件去美國，如果玩到瑞聲（2018）等等完全冇得幫iPhone生產零件，呢類七傷拳反而中國仲傷過美國。一日未認真鬱到重點科技層面，便未形成美股大插嘅理由，中美大戰維持「貿易戰」層面，科技股就會繼續成為主題股份。
喺中美打緊貿易戰之際，日股能夠向上突破，日經平均指數成分股幾乎全面上升，證明撇開貿易戰因素，環球市底未算太差。始終隔咗大半年冇乜炒作氣氛，近7個月一味流入亞馬遜、蘋果，基金元氣未至於傷到冇力報仇，問題等超賣進而風險胃納回升，等到幾時。雖然整體港股未必有力轉強，但個別板塊重現炒風不出奇。映客（3700）都炒一餐，就知大家幾咁餓波。
晉佳
http://fb.com/advanceguy1
本欄逢周一、三、五刊出
智取大市 - 晉佳 舊文
來源 source: http://hk.finance.appledaily.com