【異動尋寶】業績之後 騰訊依家貴定平？（魏力）
當市場幾乎一面倒看淡、盈利預測一再下調，無期望之下，只是一份四平八穩的業績，已足以踢鬱股價，講緊係騰訊（700）第三季業績。詳細數據請睇番魏力昨晚在fb的分析，在此不贅。本文想探討的是，究竟騰訊目前呢個價，貴定平？
可能閣下會話：「今年3
月成470蚊，依家跌到唔夠300蚊，梗係平咗好多啦！」一件衫，新貨賣800蚊，季尾清貨賣300蚊，同一件衫，800變300，只要你唔追款，名副其實係平咗好多。之但係，股票又可唔可以咁樣計數呢？答案是不可以。因為股票代表公司，而公司每年（或每季）的營運都在變動，今年1月份的騰訊，與現在的騰訊，雖然仍然係同一位老闆，但已不是同一間騰訊，因為增長速度已經唔同哂。
記得今年初，魏力在《路透》終端機查閱今年券商預期騰訊的盈利增長，答案是4成，當時股價在400蚊樓上，市盈率45倍，市盈增長率（PEG）約莫係1左右，合理。早兩個星期，魏力再上《路透》查資料，騰訊今年的預期增長已經降至13%，你無睇錯，係由年初的4成，降至13%！打個比喻，NBA籃球員跑得快、跳得高，好波到暈，我先會肯畀4,000蚊港紙入去睇波；換著係CBA，4,000蚊張波飛？相信你只會用粗口回應。4成增長的騰訊，同13%增長的騰訊，就是這個差別。
執筆時騰訊收報272.2元，歷史市盈率30倍，如今年增長真的只有13%，預測市盈率就是26倍，與13%的增長做個比照，PEG就是2。無錯，股價平咗200蚊，但增長跌得仲快，得出的結論是：目前的騰訊，比起年頭的騰訊，貴好多。
個價要點樣先至叫平番？最簡單係個價再落，又或者每年增長去番25%左右，只要股價不變，PEG可以降番去1附近。作為投資者，當然係揀後者。睇番第三季業績，純利按季持平，無再向下跌，算是踏出重要的一步，但撐起騰訊業績的廣告收入，在大陸經濟轉差的情況下，究竟可否維持高增長？魏力對此有保留。
筆者為證監會持牌人，未持有上述股份權益。
www.facebook.com/2012jason
異動尋寶 - 魏力 舊文
來源 source: http://hk.finance.yahoo.com