【Hea富Startup】成功的生意 由普通念頭開始（郭釗）
今個星期認識一位新朋友，原本他的生意模式比較普通，裝修轉介，你話幾多人做緊，但近一年他兼營建築材料，成功愈做愈大，而且理念頗為革新，話曬我都係半個行內人，問多少少，是龍是鳳，一目瞭然。
先說說這位朋友的背景，
會計師出身，曾任Big 4會計師樓，之後轉到iBank工作，高尚職業平步青雲，但行內人有苦自己知，因一次有朋友新居入夥要裝修，問他有冇裝修師傅介紹，他主動幫忙，接連介紹幾單生意給一個手工不錯的裝修師傅，朋友多謝他，師傅又搵到食，雙贏，自此他萌生做裝修轉介的念頭。
相信大家都有介紹裝修師傅給朋友的經驗，我當然有，但從沒有想過當一門生意來做，一來客源未必充足，二來裝修師傅良莠不齊，有時遇著一言不合還會有鑊氣，所以都是怕麻煩唔掂為妙。果然，朋友做了一年左右，以上問題同時出現，加上轉介費不高，連宣傳費都不夠，在差不多要結束經營的時候，一家建築材料公司在報章上看到他的訪問，主動聯絡說有興趣入股，當下他還害怕臨死前被踹一腳，經過幾次見面後發覺對方誠意十足，而且入股金額足夠他實踐之前因資金緊絀未能進行的理念——改革裝修行業。
改革裝修行業
一般人都覺得裝修是一件麻煩事，加上某些師傅比較不老實，例如用很低的報價單吸引客人落疊，開工後才說這個不包哪個不包，加埋加埋，結果埋單超出原本報價一倍有多。亦有些老實的師傅，因為不擅溝通不懂宣傳，就算手工優質都大半年坐冷板凳。同樣地，客人可能第一次買樓零裝修經驗，引政期望太高預算太緊，都是雙方爭拗的源頭。他所辦的裝修網，不止轉介咁簡單，還擔當教育雙方及溝通橋樑的角色，讓客人有一個合理期望及預算，培養師傅的專業操守，例如引入標準化工程模式，詳細列明各個項目的標準、質量，甚至乎材料的來源，最重要是收費清楚，師傅想出蠱惑都難，客戶亦冇得話未執漏唔找數，解決兩方的痛點。
創業就是由一個普通到不能再普通的念頭開始，不斷優化改變，不斷推翻建立再修正，就像Airbnb本來只是提供早餐與床墊，最後變成短期房屋出租平台。
郭釗（《HEA富學：一天只做2小時的創富方程式》作者）
https://www.facebook.com/heaology.edu
Hea富Startup - 郭釗 舊文
來源 source: http://hk.finance.yahoo.com