【財演算法】蔡嘉民：VIX可以點炒3
2018-11-7 8:00:51
上期比較過VIX期貨同期權嘅分別，今次就想加入埋VIX ETP一齊討論。VIX ETP係指VIX嘅Exchange traded product，細分仲有ETF同ETN，即係Exchange traded
fund同埋Exchange traded note。兩者有少量分別，不過唔係度細講，詳情可以Google一下。出名嘅ETP嘅例子有：VXX、XIV、UVXY、TVIX、SVXY等等，佢地分別係由唔同公司管理，而且有唔同槓桿，有啲一倍，有啲三倍，有啲係正向，有啲係反向。正向即係好似買緊VIX咁，而反向即係同VIX走勢相反，想搏個窩縮就可以買入反向ETP。
咁佢地同VIX期貨有咩分別呢？VIX期貨都有槓桿，如果用孖展黎計的話，期貨個槓桿更大，不過槓桿大個問題係，有機會輸得多過你所投入嘅本金。而ETP就好似股票咁，輸有限，最盡輸都只會輸你個本，除非你做沽空。另外VIX期貨要轉倉，ETP唔洗轉倉，呢點令到成個操作好方便。咁係咪ETP適合長揸呢？
不，因為ETP本體會有損耗，如果開幅長期嘅股價圖黎睇，佢地有Tracking error，例如VIX升5個百分比，啲1倍ETP只會升4個，所以長期黎講會出現折讓。因為都有唔少ETP係由期貨去複製出黎，即係ETP管理公司喺背後都係買緊VIX期貨，去俾返個升跌俾你，但問題係，長揸期貨會有滾動收益(Roll yield)問題。期限結構(Term structure)上，升水同貼水會令唔同月份期貨有唔同嘅表現。例如升水情況下，近月期貨會損耗得快過遠月期貨，所以正向ETP喺升水情況下，股價會有慢慢向下折讓嘅現象，呢個現象叫做Contango loss。
另外仲有2種損耗，下次再講！
財演算法 - 蔡嘉民 舊文
來源 source: http://www.winmoney.hk