A股撐住 港股逆升
2018年11月14日
美股下跌，估唔到嘅係近年弱過藥煲的港股，竟然出現近乎大奇蹟日嘅單日轉向，淡友馬上中伏，可見股市難玩，亦反映近日股市難測。
華爾街位高勢危，理由唔使股市專家都可以解釋，包括蘋果股價急插、油價下滑、債息向上等。其實，說穿了就係選後疲憊症。中選期間特朗普化身
財演，大力催谷股市，不但講到明共和黨選贏有得升，各種主張都致力維持升市，喺佢谷得咁行底下，選完唞唞都好正常。從呢個角度嚟睇，美股調整根本唔需要理由。
人仔回升露反攻端倪
美股調整有路捉，港股表現反而有啲估佢唔到。今年慣例係美股升，港股跌；美股跌，港股再跌。噚日係美股大跌，港股低開，但指數就無美國跌咁多，午市前仲受A股帶動同人民幣匯價力撐，跌幅大為收窄，最終恒指收報25792點，反升159點；國企指數收報10478點，漲38點；紅籌指數收報4232點，升26點，成交金額909億元。
人仔匯價受貿易談判利好消息帶動回升，離岸同在岸價都上漲。喺美元強勢下，人仔表現向好，為股市反攻展開序幕。呢排大行紛紛睇淡人仔，好多分析覺得會破七。大和資本亞洲區首席經濟師賴志文啱啱仲估計，現時中美已經接近零息差，未來美息或會持續高於中國息口，加上貿易戰令中國貿易盈餘受壓，令人民幣貶值壓力加劇，加上市場要償還美元債，亦會推高美元，預計人民幣明年可能會貶至7.6兌1美元。
但係人仔喺美股大插時逆市向上，加埋內地A股向好，成為港股市場回升嘅原因。
好明顯，呢次港股唔跟跌係同內地有關，內地喺貿易不明朗下，積極推動各種抗逆措施，試圖穩定市場信心，喺美國中選境況最差時發揮左保底作用。O依家強流過去，市場憧憬貿易問題有一段時間會回暖。本來喺選舉期間，美股被特朗普力谷上番高位，港股跟跌唔跟升，仲喺今年低位，有啲超跌感覺，亦造成昨日佢開市初段跌得少過美股，呈現抗跌力的理由。內地股市上升，上證指數收報2654點，收升24點後，港股就順理成章來個絕地反擊。
中港股市頂住美股逆流，我覺得主要度力唔係港股，而係A股。由於A股已經插到2449點呢啲幾硬的底部，O依家上番2600點樓上，部份計基本因素的分析家開始留意當中價值，內地就更加大力唱好。好似全國工商聯會名譽主席黃孟復喺出席「《財經》年會2019」時，有幾句話就有點意思。佢話中國股市完全脫離經濟發展基本面，(指數)2000多點談起來都丟人臉，嚴重低估中國企業價值」。佢認為「為甚麼會這樣，應該認真分析」。
黃孟復唔係股市專家，佢係從另一個角度睇問題，話內地股市跌到令人覺得丟臉的事，係茶餐廳式大叔用常理評論的睇法，但有時呢啲唔花巧的觀點，可以點穿好多聽落高深的理論包裝。用佢的講法，A股跌到咁殘係件醜事，無理由、亦唔應該讓佢繼續發生，就係咁簡單。
茶餐廳式評論認為A股太低殘，大行都開始有呢種睇法，瑞銀財富管理發表報告，指由於內地企業目前估值過度反映盈利放緩預期，預期A股在未來6至12個月會有低雙位數上升空間。
瑞銀報告認為，預計中央會採取更多措施支持實體經濟，加上資本改革和外商投資等，有助提振內地市場情緒，短期內看好金融和工業類等具防禦性股份。
坐冠忠唔使落車住
港股雖然暫避一劫，但好難講話短期就直入坦途，只係呢次免跌開始畀到人對內地維穩回復少許信心，往後仲要睇A股同美股表現。若然美股繼續急插，港股都可能上下波動。
喺港股玩大逆轉中，有隻股仔表現突出，就係日前陸羽仁拆過局的冠忠巴士(306) ，佢昨日大升逾7%，收報5.5元。冠忠炒大橋概念，跑贏大市成條街，O依家當然唔敢叫人高追，但上左巴士者去到大橋咁靚風景，照計唔使咁快落車，可以上移止賺位繼續欣賞吓好風光先。
陸羽仁
金融High Tea 舊文
來源 source: http://hdfin.stheadline.com