中環在線 - 李華華 2018年12月12日
中環在線：鼎泰豐倫敦開店反應大好 - 李華華
英國前外相約翰遜跟鼎泰豐董事長楊紀華（右）學整小籠包，有板有眼。 適中字型 較大字型
英國脫歐協議拖拖拉拉兩年多，市場普遍睇淡英國經濟。新加坡麵包物語（BreadTalk）逆市而行，本月初喺倫敦Covent garden開咗鼎泰豐，作為進攻歐洲市場嘅頭炮。聽講開業一星期反應幾好，即使平均要等足四至五粒鐘先有位，日日大排長龍。
麵包物語以特許經營形式，將台灣鼎泰豐進軍歐洲，揀咗倫敦開設全歐洲首間分店。上星期三BreadTalk主席郭明忠、鼎泰豐董事長楊紀華、英國前外相約翰遜同英國諧星Stephen Fry齊齊賀新舖開張。西裝骨骨嘅約翰遜更著上白色圍裙，跟鼎泰豐董事長楊紀華學整小籠包，手勢有板有眼。
麵包物語今次透過子公司Taster Food UK，跟台灣同英國合作夥伴，簽特許經營協議。郭明忠話計劃明年喺倫敦嘅Centre point再開分店，目標全英國開20間分店，開舖策略幾進取，目前香港只有四間鼎泰豐分店咋。
講返倫敦嘅鼎泰豐，新舖共有兩層，佔地8,000平方呎，最多可以容納250人。新店跟台灣同香港一樣，附設一個特大玻璃窗嘅廚房，可以遠觀師傅整包點嘅功架。目前倫敦鼎泰豐不設訂位，大家想食就畀足耐性去等位，平均要等四至五粒鐘先有得食。
李華華
mailto:LiWaWa@AppleDaily.com
LiWaWa@AppleDaily.com
中環在線 - 李華華 舊文
來源 source: http://hk.finance.appledaily.com