冰說聰明 - 青冰 2018年12月27日
冰說聰明：「因航」蝕油蝕到盡頭 - 青冰
國泰已減少燃油對沖。 適中字型 較大字型
國際油價跌至18個月低位，短短兩個月由高位跌近五成，速度之快可媲美2014年，常理推斷，機票的燃油附加費應有下調空間，點知去國泰（293）網站一看，長途機的附加費只由652蚊微降至584蚊，元旦生效。
民航處見國際間已逐步撤銷對燃油附加費的規管，終在今年9月宣佈可以復收，但必須在總票價時清楚列明機票價格、燃油附加費及稅項的分佈，而國泰亦立即帶頭徵收，這消息亦一度刺激當日股價急升7%。
提起燃油，大家都會記得國泰的神級對沖，令業績連續兩年見紅，2011至14年油價長期高企100美元樓上，不知那位高手決定為未來四年的燃油作大手對沖，將燃油價鎖定在約90美元，對沖比率高達六成，跟住大戶似乎睇住國泰來打，布蘭特期油從2014年6月高位115美元，7個月內跌至45美元，一般航空公司當然拍爛手掌，但「因航」對沖比率高，註定未來幾年要挨貴油，年年因對沖而蝕幾十億。衰了幾年，年初管理層已經講明，2019年的對沖比率只會維持在兩成左右，盡量少做少錯。
上月底的分析員會議，國泰披露下年的對沖比率約三成，鎖定成本在60至70美元，對沖比率較年初所講的略高，或許因為今年8月起油價挾得太急，衝上85美元，國泰臨急臨忙補返些，因為那時個個都話油價睇100美元。最新布蘭特油價是50美元，雖比國泰成本價低兩成幾，但總算大有進步，況且還有七成無對沖，必然受惠油價怒插，不要忘記仍有收燃油附加費，食盡兩家茶禮。
從成本面看，國泰已走出困局，但做生意幾時都要睇topline，股市跌到反艇，來年經濟肯定收縮，貨運及商務旅遊收入將受打擊，國泰都算黑仔，經濟好時衰自己，重整旗鼓就遇逆境。
近年大家都話香港航空已超越國泰，但時移世易，你過到呢關再講啦。
青冰
http://fb.com/chingbing888
本欄逢周四刊出
冰說聰明 - 青冰 舊文
來源 source: http://hk.finance.appledaily.com