A股變身擎天一柱
2018年12月27日
全球股市平安夜不平安，美國華爾街掀起拋風，杜指勁跌653點，跌幅達2.9%。到聖誕節各地投資市場隨即震盪，日股反應最得人驚，急插1010點，一舉跌穿20000點，跌幅高達5%。同日內地股市跟隨美股大幅低開後V彈，收市幾乎收復失地，只跌0.9%。市場傳言有國家隊
入市。到昨日A股變動不大，上證綜指收市跌6點，報2498點；深成指數跌42點，收報7289點。喺各國主要市場中表現已經算硬淨，有小小擎天一柱味道。
特朗普有跛腳鴨感覺
美股呢鋪下插，主要係因為聯儲局被指加錯息同政府停擺，兩場大龍鳳總統特朗普都係主角。聖誕假期間佢留守白宮，百無聊賴繼續發炮，狠批聯邦儲備局主席鮑威爾，又重申若果國會唔肯撥款起美墨圍牆，不惜令政府繼續停擺。特朗普雖然聲大大，但明眼人會睇到中期選舉後，共和黨丟失眾議院後，總統要通過爭議性政策難度增加。喺1月1日後新議員上任後，特朗普好可能會有點跛跛地之感。
特朗普任期做咗一半，已經周身病痛，華爾街老牛有可能已經死亡。香港都好可能受衝擊，但本地股市除咗受美股影響，近年都受北風左右，若然內地吹暖風，咁香港都冇咁凍。從ADR所見，港股跌幅為390點，無美股同日股跌幅咁厲害，原因相信係同A股相對硬淨有關。睇番喺假期前，美股已經連跌幾日，恒指最後一個交易日最多跌331點，但就彈上全日高位收市，收報25651點，跌102點；國指下滑38點，維持相對強勢。
港股呈現抗跌力，其中一個原因係中央經濟工作會議指出，加快5G商用步伐，加強人工智能、工業互聯網、物聯網等新型基礎設施建設，帶動5G概念股上漲，京信通信(2342) 收漲7.3%，報1.32元；中通服(552) 收揚5%，報6.47元；中興(763) 收漲2.7%：中國鐵塔(788) 創上市新高，高見1.52元，收報1.51元，漲2.7%。當然，內地股市穩定對港股有好處，但如果美股再散，港股或多或少都會受累，只不過喺亂世之中，輸少已經係當贏。
股市立立亂，聖誕假好多人索性攞多幾日假外遊散心，呢個時候突然有人唱淡香港航空，形容公司危危乎。同中環茶友傾起，他坦言港航財政令人關注，呢個都係全球資金退潮造成現象之一，同時反映內資打入香港市場遇到的障礙。
茶友識得港航高層，年前對方仲有叫佢捧場，叫他買啲集團債券，當時呢啲債券息口有近10厘，在利率低迷嘅日子確係幾吸引，茶友雖然係穩陣派，但都買咗啲用嚟收息，當時心態係利息咁低，資產漲價，借錢畀人投資炒作，風險唔係咁大。但呢一年再有呢類高息公司債，茶友都唔係咁敢捧場，理由係全球央行收水，資產漲價潮好可能告一段落，這個時候就擔心利大本無歸。
海航套現減磅機會高
今次港航被人唱淡，原因之一係有公司債即將到期，因為債息飆升惹起負面傳聞。不過，茶友覺得呢個時候有呢類消息，唔排除有人落井下石。睇番港航出現負面消息，源頭係幾年前集團同系公司喺香港以超前價爭奪啟德靚地，結果用200億元連得四地，當時外界就有聲音批評公司過勇，質疑集團是否計錯數。此後，不利公司傳聞就停不了。隨著中央收緊民企海外投資，海航財政壓力有增無減，呢次再爆負面新聞，喺財政壓力咁大下，公司賣盤機會唔低。
茶友話，本地航空市場一直由國泰(293) 穩坐龍頭地位，差不多等同壟斷，其他公司根本無力挑戰。回歸前，喺內地人脈好強勁的曹光彪夥拍船王包玉剛組成港龍意圖染指，結果都係鬥唔過國泰要賣盤。幾年前，港航趁國泰喺燃油對沖出錯，大力進軍市場，憑藉平價資金優勢不斷擴張，對國泰構成好大威脅。不過，現時利息同資金供應環境逆轉，港航變成大打逆境波，相信好大可能要引進大股東泵水。由於本港航空服務，政府有嚴密監管，相信喺大股東現身前，都會全力維持運作。
港航股東隨時變，同屬海航旗下的香港國際建投(687) 仍持有啟德一個項目。本來海航好想保留項目自行發展，但隨著環境改變，市場估計母公司可能連最後一幅地都出售，甚至可能連國際建投都一併沽出，實行套現減磅。
陸羽仁
金融High Tea 舊文
來源 source: http://hdfin.stheadline.com