半冷股遇暖風
2019年02月27日
A股日前狂飆逾半成後唞唞氣，港股回吐仲加明顯，但市場個別股份炒上，而且首掛新股表現改善，反映市場風險胃納增加。喺調整市中，有個股表現突出，有隻投資者可能從未留意嘅半新股兗煤澳洲(3668) 股價逆市急升32%，收報23.2元，推動股
價急升的原因是公佈業績靚仔。集團2018年全年業績，盈利8.52億澳元，按年大幅增長2.72倍，每股盈利67.6澳仙；派末期息88.85港仙及特別息70.09港仙，合共158.94港仙。股價未爆升前，息率差不多有9厘，即時吸引資金湧入。
兗煤澳大利亞是甚麼公司呢？顧名思義是國企兗煤喺澳洲嘅企業，集團去年底以23.48元招股，上市即破底，現在雖然業績靚爆兼有好派送，但股價基本上未上番水面。兗煤澳大利亞的背景係2004年由兗煤收購多家澳洲煤礦組成。現時原煤產能每年8000萬噸以上，正式成為澳洲最大嘅獨立煤炭生產商，喺澳洲全部礦業公司中位列第三。而且先後擁有排名第2、第5同第9嘅三個澳洲前十大低成本、大規模的動力煤礦井。從今次業績可以睇到集團資產質素唔弱。該公司招股時市場反應欠佳，股價破底，估計不少股份仍喺好友手上，既然如此，就不如嚟個慷慨派送酬謝知己。
兗煤澳大利亞爆上
煤業係最唔性感嘅傳統產業，影響公司估值，但內地雖然話關注環保，但係可見將來依然要依賴燃煤作為主要能源，從呢個角度講，兗煤澳大利亞有一定的基本實力，只係呢類舊經濟股一向唔吸引，現在能夠借派送消息爆上，固然因為貨源集中，同時也反映市場氣氛好轉，風險胃納增加。現時該股股價升幅遠超派息，如果想炒派送，可以等股價回復平靜時先動手。現時大市累積升幅不少，資金開始換馬，沽出穩陣嘅獲利股份，買賣波幅較強嘅股份，估計類似尋寶潮會維持，半新股係當中一個類別。半新股質素參差，但個別大股實力不俗，有反覆上升潛力，好似陸羽仁介紹過嘅中銀飛機租賃(2588) ，收報69.2元，又升0.6元，有向70元邁進之勢。中銀飛機租賃2016年中上市，當時招股價42元，股價一度破底，但去年開始發力，現在累計上升超過五成，連同派息回報相當吸引。呢類資本密集嘅公司發展潛力大，就有慢火煎魚慢慢上升嘅空間。
A股交投達1.1萬億
市場開始注意好似兗媒澳大利亞或者中銀租賃等有啲冷門嘅公司突然春風得意，說明投資情緒升溫。周初內地A股成交之大，做成嘅心理刺激更大，昨日A股稍為走低，滬指收跌0.67%，報2941；深成指收跌0.5%，報9089，但兩市成交額仍高達1.1萬億元人民幣，再創2015年11月來最高水平，市場認為上證指有條件上望至3000大關。同樣港股成交略減至1335億元，但仍是連續5個交易日主板成交過千億元。恒指終收降187點，報28772，四連升斷纜，國指收造11543，跌87點。A股加槓桿大舉回歸，中國證監會回應關注場外配資增多，加強對交易全過程監管，要求融資融券客戶適當管理等，內地券商股回吐。華泰(6886) 收跌6%報17.02元；中信建投(6066) 收插5%報7.5元；海通證券(6837) 回吐4%報10.8元。
美國總統特朗普批評油價過高，隔晚國際油價挫逾3%，「三桶油」下挫，中海油(883) 收跌1.4%報13.7元；中石化(386) 收降0.7%報6.77元；中石油(857) 收跌0.6%報5.28元。三桶油股價跟國際油價走，如果相信後市會跟A股炒上，油股就未必會跟得足，另一個進取短線策略係睇位套現，轉炒一下其他落後股。
陸羽仁
金融High Tea 舊文
來源 source: http://hdfin.stheadline.com