金手指 - 孫柏文 2019年5月28日
馬上成為壹會員
會員註冊/登入
【金手指】英鎊未到買得時 - 孫柏文
英留歐、脫歐支持度勢均力敵，兩邊支持嘅人，態度越來越強硬。 資料圖片 適中字型 較大字型
對上幾日歐盟議會選舉，英國區就脫歐黨Brexit Party大勝。而投資者向前望，最難預測有幾樣。首先，傳統兩大黨，即工黨同保守黨大敗。係咪大洗牌呢？
再睇，留歐、脫歐支持度都仲係勢均力敵。兩邊支持嘅人，態度越來越強硬。好似有個英國教授話齋，兩面人數要變，唔係因有人回心轉意，而係之前未夠秤，未有投票權嘅人，取得投票權後，大多數撐留歐。喺未來12個月，最大影響將會保守黨、工黨都要喺脫歐議題上一注獨贏壓注。𠵱家騎牆嘅定位，必會亡黨，所以政客作為機會主義者，一定會搵位企。
當然，最直線嘅分析。就係脫歐黨話到明，兼姿態上都話除硬脫歐外，對執政冇興趣。而唔脫，就遇人殺人，遇佛殺佛。所以用最簡單嘅博弈論估，只要脫歐黨能夠保證保守黨可以繼續執政，例如臨大選前退，保守黨就會交個硬脫歐出來。市場未分析得孫柏文快，所以未來當市場開始歸我邊，英鎊就會一步一步咁踩落去。
歐盟本身，雖各地反歐勢力有升，不過威脅不會預期咁大。所以歐元短期將有支持。不過，未來五年，歐盟勢必增快「合一」之勢。軍隊、外交等都交歐盟控制。而當布魯塞爾權咁大，議會冇監察力，三萬說客腐化歐盟官僚、立法過程會更嚴重。
孫柏文
獨立股評人
fb.com/shuen
本欄逢周二刊出
金手指 - 孫柏文 舊文
來源 source: http://hk.finance.appledaily.com