大棋局 - Mr. Tregunter 2019年5月28日
馬上成為壹會員
會員註冊/登入
【大棋局】中美貿戰明硬實軟 - Mr. Tregunter
特朗普放風話貿易協議可以再傾一個月，結果被中國偷到雞，摸到特朗普底線其實係有價講。 資料圖片 適中字型 較大字型
中共談判向來有個特色，就係條件可以傾，原則問題唔可以傾。但當埋枱後，就會話大部份都屬於原則問題，藉此要談判對手不斷貼近自己的要求。冷戰時代中美各類談判，美方好老正地同中方傾協議中過伏，時至今日對中方的談判方式已明暸。加上特朗普個人風格，今場貿易戰一開波就係一場show hand。
貿易戰兩個重要轉捩點，其一為美國副總統彭斯發表演說。其演說如一篇檄文，細數中國四十年來點樣走數。最重要為最後一句，美國仍然承認一中原則，只要中國履行四十年前的承諾。由此刻開始，中國對貿易戰轉為低調冷處理，不刺激美國，為嘅係要審視彭斯講話有幾多成真。
第二個轉捩點，為中國在貿易協議埋尾階段，突然要求修改部份協議。特朗普不高興，加關稅制裁中國，但旋又放風可以再傾一個月。結果被中國偷到雞，摸到特朗普底線其實係有價講。呢一下，中國技高一籌。如果當下特朗普加關稅制裁中國並宣佈談判破裂，即彭斯演說內容為真。特朗普冇咁做，中國判斷可以強硬一點。強硬非為拆台，而係要最後鍊價。
下月埋枱料各讓一步
特朗普知道露咗底牌，實施新制裁係修補手段，尤其針對華為及其他中國電訊科技企業，示意再講價鋤你兩錢重。事情之演變其實只係回到貿易戰開波初期狀況，雙方互嗌會制裁同反擊，只係層次不同，雙方心中已有個底。
現時貌似八方圍華為，美國是否真要封殺華為，視乎點計利益大。去外地旅行應有相同體驗，香港電訊網絡比好多國家先進。好似紐西蘭地廣人稀，部份地區連電話都用唔到，如果架車死火，唔好彩隨時要等一日先見到第二架車經過救你。這些地方需要平價電訊設備，華為係全球最大的4G網絡設備供應商，而5G網絡需要用到不少的4G基礎設備。有條件監察下利用華為，比直接封殺著數。五眼聯盟國之經要部份不用華為，但平民利用有著數，並非簡單一刀切。
2020年係一個重要年份。特朗普要騰出空間，準備應對中東石油戰略；中國現下形勢比人弱，若要反制，時辰未到。故此縱然雙方表面擺陣吶喊，下個月埋枱估計就會各讓一步。毛澤東話共產黨有三寶，其一為統戰。統戰包含拉攏、離間、遊說、談判……進入大爭之世，若想了解中國點樣處理談判問題，有本《中國共產黨統一戰線史》可以一讀。
Mr. Tregunter
本欄逢周二刊出
大棋局 - Mr. Tregunter 舊文
來源 source: http://hk.finance.appledaily.com