操盤手札記 - 割柑人 2019年6月18日
【操盤手劄記】娥翼下點樣揀股 - 割柑人
公用股唔受政治風波影響，若隨大市回調，係長線買入機會。港燈現價股息率5.1厘，走勢呈三重底突破。 資料圖片 適中字型 較大字型
一隻草地貪夜蛾，足以令大國全民草都無得食。香港亦有一隻「娥」，令全民寢食難安。難怪股壇長毛David Webb話，如果林鄭月娥係一隻股票，會建議沽空佢，目標價係零，稱之為「Carrie trade」。
現時距離G20峯會不足兩周，習特會尚未落實。喺中美關係緊張下，《逃犯條例》修訂風波令習近平非常尷尬，美方更食住上，放風特朗普會喺G20峯會打香港人權牌。《路透社》爆料，北京認為林鄭處理修例手法拙劣，質疑佢嘅能力。林鄭卸任，進入倒數。
林鄭唔單止為中央添煩，亦為投資季節中最艱難嘅6月添亂。暫緩修例雖然未能平息民憤，但稍為紓緩資金流走、樓價下跌嘅憂慮，昨日港股喺地產股領軍下反彈，升0.4%。不過，若無新嘅妥協方案，示威仍會繼續影響投資情緒。
本周重頭戲，落喺周四。美國聯儲局本港時間周四淩晨2時公佈議息結果，之後輪到日本央行同英倫銀行。市場估計美國本月息口不變，但7月減息機會率近九成；一旦預期落空，恐怕觸發股市回調。
刻下，修例風波，餘波未了；G20習特會，會期未定。若係政治風波引發嘅跌市，往往係低位入貨嘅機會，但揀股時，要睇行業基本因素有無變化。公用股如中電（002）、港燈（2638）、煤氣（003）等，唔受政治風波影響，若隨大市回調，反係長線買入機會。
大和早前發表報告，認為下半年至明年通脹或會減慢，對收息股有利。公用股向來係收息股穩膽，皆因業務穩健、派息穩定，對食息一族，係現金流穩定來源。兩電一煤中，港燈係商業信託，規定至少九成利潤派息。該股現價股息率5.1厘，走勢呈三重底突破。
割柑人
本欄逢周二刊出
操盤手札記 - 割柑人 舊文
來源 source: http://hk.finance.appledaily.com