【異動尋寶】減息炒完 食花生等「習特會」（魏力）
「個市升得好地地，點解昨日無啦啦跌300㗎？係咪反彈完喇？」魏力近月不斷同戰友講，睇市要闊一點，唔好只係死盯港股，你就會明點解。
全球主要市場之中，目前最強仲係美國，打哂開口牌減息，又隨時重新買債，你見金價1個月狂升10%，債息跌穿2厘
，bitcoin升穿1.1萬美元，唔係講笑，市場已做足準備，美國今次係堅會大開水喉，其他國家必然「二字底」死跟。全球再來一次量寬，銀紙步向廢紙，又再近一大步。
不過，即使放水憧憬如此強烈，但近幾日美股高位都搖搖欲墜。睇指數可能無咩feel，望嚇sector感覺就完全不同，龍頭半新股Beyond Meat 幾日由200插落140美金；高增長科技股如 Roku、The Trade Desk、Shopify，全部高位隊1成以上，可見回吐壓力已湧現；長期「二奶命」的港股，調整也是情理之中。
通脹無影無蹤之下，印錢撐市順理成章，但過去十年經驗告訴我們，印錢最受惠只係資產價格，特別係實物資產（對港人來講，即係樓），股票就好個別同短癮，皆因股票同銀紙一樣，可以不斷印，每年拎個mandate就印多20%，論保值程度自然大為遜色。所謂「穿越牛熊」的長升長有股，港股可說鳳毛麟角，揀中都係好彩，咪以為自己獨具慧眼。
港股呢輪反彈，升得最勁係乜？就係內房、內需、收息股。人仔「破7」可期之下，有錢的大陸人，首選係搬錢出去，搬唔到又要保值，都係買樓傍身。內需係炒不受貿易戰影響，同埋個需求仲係上緊，增長、避險因素俱備。至於高息股，就係睇住美國十年期債息去做，買債收唔夠2厘，有5厘的REITs點會唔吸引？不過提提戰友，買收息股首選係業務穩定（例如公用股、REITs），而唔係息率，唔小心買隻交行（3328），睇落有5.7厘息，但昨日一棍就蒸發近4%，欲哭無淚！
最後講講G20。目前consensus係「中美唔會傾得成、又唔會反枱」，邊打邊談，關稅唔會再加辣，已經收貨。「關稅戰」會逐步演變成「科技戰」、「金融戰」，好似昨日一單「幫北韓洗錢」的報道，成堆內銀就散哂，日後類似事件陸續有來；買內需揀隻民企，隨時又要硬食沽空報告；仲有盈警、批股、國策、斬倉等地雷，可說避無可避。心血少的話，還是少沾手為妙。
筆者為證監會持牌人，未持有上述股份財務權益。
www.facebook.com/2012jason
異動尋寶 - 魏力 舊文
來源 source: http://hk.finance.yahoo.com