魚樂無窮 - 唐牛 2019年6月6日
【魚樂無窮】年輕唔怕輸鑊甘 - 唐牛
投資炒賣，挫敗經驗令人學識何謂風險管理，往後炒作更得心應手。 資料圖片 適中字型 較大字型
本欄見網見報之時，我已身處外地，嚟緊幾期專欄，貼市東西將欠奉，一來想專心遊玩，暫將冧巴放低，二來市況奇弱，要搵嘢炒都唔係易事，仍然希望落場過手癮的戰友，請移玉步至隔籬鄰舍專欄尋找魚缸樂趣。
留下來的戰友，我當然唔會待薄，趁中場休息同大家分享一下作戰經驗。還記得上周二獲邀出席本報網站新節目「理財急Call」，解答股民的奇難雜症時，有一位年輕美少女表示，因為炒衍生工具輸大鑊，希望尋求指引。
初出茅廬嘅我，與這位美少女一樣，也曾經沉醉於炒窩輪，無他，正如每位投資初哥般，有本金太少的煩惱，幾萬蚊買正股，叻極都係贏一兩千蚊，炒輪呢？槓桿效應下隨時可以double。當時剛巧大升市，贏錢好easy，漸漸地越炒越大，最終碰上大調整，結果係點，相信大家都估到。
現在回想，其實十分慶幸一早試過一鋪清袋的滋味，因為年輕人有的是時間，輸咗畀心機做嘢搵錢，可以瞬間復原，如果一直順風順水，到中年才出事，恐怕已翻身無望。同一時間，挫敗經驗令我學識何謂風險管理，往後炒作更得心應手，事實證明學費不怕交，但不可以白交。
唐牛
http://fb.com/tongcow88
本欄逢周二、四刊出
魚樂無窮 - 唐牛 舊文
來源 source: http://hk.finance.appledaily.com