收市閒情 - 千頌C 2019年6月5日
【收市閒情】科技冷戰下一戰場 - 千頌C
TikTok作為一個大陸App，竟然成功打入美國市場。至今年3月，全球下載量已超過10億次，活躍用戶逾5億。互聯網圖片 適中字型 較大字型
中美科技冷戰，由中興（763）禁令開始，再封殺華為，順理成章禁用埋Android，於是大家開始意會到，軟件將會成為下一個新戰場。
近年中國開始有唔少社交媒體反攻歐美，而且大受歡迎，其中一個，就係TikTok，亦即係字節跳動旗下抖音嘅國際版。
認真，TikTok呢個App係得人驚，第一個驚在於，作為一個大陸App，竟然成功打入美國市場。今年第一季，美國下載量135萬次，按年增184%，打低Instagram及 facebook成為榜首；至今年3月，全球下載量已超過10億次，活躍用戶逾5億。第二個驚，佢可以輕易喺年輕人圈子，掀起一啲大人未必明嘅熱潮，例如咩？大家記唔記得，上年一街細路變曬做貓：「我們一齊學貓叫，一齊喵喵喵喵喵」？！
軟實力外銷嘅威力，永遠都唔可以忽視。特朗普由參選到今日，都強調American first，任佢再憎facebook，都唔會對中國社交媒體喺美國勢力坐大視而不見。
華為被美國封殺，死因係竊取美國商業機密，對國家安全構成威脅；而早就被美國智庫點名，指用戶數據會傳返中國嘅TikTok，未來就更容易成為風眼。事實上，早於今年2月，TikTok於美國被罰570萬美金，指其涉違規收集兒童私隱。所以，假如有一日，特朗普突然出tweet，「我要封殺TikTok！」一啲都唔出奇。
字節跳動目前市值已逾750億美金，更有傳將於今年上市，選址方面，分別傳過香港、上海、紐約。當阿里巴巴都話要返香港第二上市時，紐約可以out，餘下嘅就只係港、滬之爭。
貿易戰下，如果中概股想吸國際資金，香港係好合理嘅市場，所以港交所係有一定程度著數嘅……暫時。不過，中美角力，林鄭獻上《逃犯條例》絕佳箭靶畀美國，當香港正式成為貿易戰新戰場，到時會點？去維港獻嚇花，玩抖音扮貓叫，飲杯喜茶，然後？沒然後，等死吧。
千頌C
http://fb.com/winbigwok
本欄逢周三刊出
收市閒情 - 千頌C 舊文
來源 source: http://hk.finance.appledaily.com