亮說亮話 - 湯文亮 2019年7月16日
【亮說亮話】官員應叫市民買樓 - 湯文亮
過去十年，有能力發聲的香港官員，一直叫市民唔好買樓。 資料圖片 適中字型 較大字型
過去十年，尤其是在曾特首推出SSD之後，有能力發聲的香港官員對於樓市只表達一個聲音，就是叫市民唔好買樓。
不過，這是公開的說話，私底下如何我並不知道。如果我是官員，過去十年，一定會不停叫市民買樓，最緊要是能夠負擔得起。官員們應該知道政府沒有辦法提供足夠供應量，最多是出辣招減少需求，既然政府已經出辣招，官員們又何必加多一句，但辣招效力過後，樓價就會飆升。
老實說，做官的人可以唔出聲就最好，如果可以對市民發聲，就一定叫市民買樓。事實上，官員講甚麼，市民並不太理會，叫市民買樓或者唔買樓，效果都是差不多，但叫人買樓，官員們還可以有尊嚴地面對市民，現在就很難講，唯有希望有一日香港經濟環境惡化，樓價下跌，官員們才可以大大聲話一早已經叫市民唔好買樓。
有人話我也是叫人唔好買樓，我同意，但過去十年之中，我只是近兩三年才叫人唔好買樓，以前我是不斷叫人買樓，理由是沒有足夠供應，樓價必升。但我發夢都想唔到，政府用了超過十年，至今仍然未有辦法提供足夠供應量，如果我知道，一定叫人買樓，究竟現在買唔買樓，都是同一句說話，有能力就幾時都可以買，如果要採用高成數按揭就要慎重考慮。
湯文亮
jacinto.tong@gmail.com
本欄逢周二刊出
jacinto.tong@gmail.com
亮說亮話 - 湯文亮 舊文
來源 source: http://hk.finance.appledaily.com